逼供搞喊細路改稱「心理測試」 被爆料後死撐私人恩怨
黃店為掠水不擇手段，剝削童工更係家常便飯。噚日就有網民喺「連登」發帖，指土瓜灣黃店「×砌」搵未成年「前線手足」送外賣，唔只連最低工資都唔畀，仲見人家貧，老屈人哋穿櫃桶底，仲車佢上飛鵝山逼供，最後搞喊「手足」被勸止，就改口話係做「心理測試」，仲獨留手足喺山上。有知名「黃人」就企出嚟力證真有其事後，「×砌」雖然承認同「手足」上過飛鵝山，但就似想死撐係私人恩怨。搞到網民都慨嘆：「所有自稱黃店都食緊人血饅頭，目的都係為錢......」●香港文匯報記者 黃書蘭
事緣係着草海外嘅「手足」「資深fb鍵盤戰士」噚日喺「連登」發帖話：「土瓜灣有間黃店有兩個負責人，喺2020年暑假利用個14歲嘅『前線手足』幫佢做外賣仔（無保險無人工嗰隻），個手足每日幫佢由夜晚9點送到凌晨2點半。係（喺）（2020年）8月24號凌晨，兩個負責人車個『手足』上飛鵝山，肥嘅負責人嚴刑逼供個『手足』，屈個『手足』偷咗1/7至24/8每日唔見一半營業額，先十幾萬，重（仲）要話個『手足』因為屋企環境唔好要偷鋪（舖）頭錢。好喇，個『手足』根本無做過，俾佢哋逼到喊晒，跟住另一個負責人就叫停。肥嘅負責人就扮晒嘢話係做心理測試！嗰（位）『手足』就因為呢件事，令到佢以後都唔相信黃店！」
黃人黎文浩證真有其事
攬炒派組織「維修香港」前會長黎文浩發帖證明真有其事：「我黎文浩可以做證， 而另外一個當晚有份去飛鵝山嘅員工，我都會勸佢做證， 當晚我喺�哋樓下聽住佢哋講話要去飛鵝山食糖水......最後獨留『手足』在山上，幸獲有心司機免費載該『手足』平安回家。」
惡行被揭，「×砌」就喺fb發帖叫苦主「落鋪（舖）傾」，但冇就剝削童工作解釋。
苦主「Carson Zhang」隨後就喺fb現身解釋：「我對呢間黃店覺得可恥......我爸爸就因為中風，就令到我屋企嘅經濟環境一直都差。呢間黃店嘅員工就攞住呢一件事來做原因，就話我偷錢，仲要當係（做）一個『心理測試』。我先父係（喺）年初一已經鶴駕（駕鶴）西遊......我喺屋企守緊孝，完全冇辦法去當面對質。」
有網民盲撐黃店圍攻受害人
「Carson Zhang」挺身指證，卻換嚟唔少盲撐「黃店」嘅「黃絲」圍攻。「Jonathan Chow」嘲「手足」賣慘：「個post不停拎老豆（竇）黎（嚟）打親情牌，證據又無，WhatsApp紀（記）錄又無，似係想做×人喎！」
「Kason Cheung」更話：「如果係真，建議報警，出post係無用的。」 「Kumsy Choi」就睇唔過眼：「永遠有啲人聽到黃店俾人指責嘅時候第一句都係問：難食點解你唔當場講？有問題你做乜唔報警？係咪搞分化？永遠都係咁，我覺得叫人報警嗰啲人更加有問題囉。」
「Intous」更直言：「其實間舖曲線認咗有車人上飛鵝山，半夜車人上飛鵝山已經唔合理啦？事主點解會跟佢哋上去就另一回事。如果真係如黎文浩所講最後冇車返事主走，咁已經夠×街啦！」
「土耳其的天空」亦力證間舖有問題：「如果間野（嘢）真係做過呢啲事都唔×出奇，土瓜灣既（嘅）人都知道間野（嘢）得罪人多稱呼人少，以前仲係肥媽個（嗰）陣就好地地，又夠『黃』，一轉左（咗）手就夜晚好多mk古惑（仔）係（喺）鋪（舖）面到（度）勁嘈......啲居民見到都唔敢走過去個（嗰）邊。」