黃媒看準「黃絲」反智易呃，成日亂咁「造神」，真正嘅目的一係就要搞眾籌掠水，一係就出嚟搶政治資本，甚至兩者兼之。由「獨人」馮達浚創辦嘅網媒《加山傳播》日前就以「被國安看漏眼的『危險人物』-莫熾韜：去澳洲選國會議員」為題作專訪報道，吹捧呢個無人識嘅、澳洲籍嘅莫熾韜（Max）點樣喺澳洲做「香港的代言人」。真係「多個人多雙筷」咁簡單咩，𠵱家擺到明有人出嚟爭食，有自稱「勇武」者就出嚟鬧爆《加山》亂派「光環」：「唔會比（畀）依（呢）啲人坐享其成！」
唔少攬炒派政客靠住同外國政客嘅合照、食飯，以打國際線為名叫「手足」課金。《加山》篇專訪就猛咁吹捧莫熾韜，話佢係「澳港聯前發言人（但被澳港聯割席），話曾經作為代表出席澳州國會的聽證會，所以也算是鄺頌晴aka娘娘、羅冠聰、張崑陽之輩了」、「Max就是那個香港的代言人。」
該篇專訪仲話，莫熾韜曾獲邀出席過澳洲搞嘅「聽證會」，然後再引用佢話要參選澳洲議員：「聽證會實際上就只係一場大型公關show、政黨角力。」「既然要大費周張（章）一獲國會議員芳心，就不如自己做國會議員。」
不過，莫熾韜嘅自我吹噓就搞到唔少自稱為「勇武」者睇唔過眼。自稱係俾警方追剿嘅黑暴「屠龍小隊」隊長Edward就係tg發文踢爆：「佢話被澳港聯割席，但係Max從來唔係澳港聯既（嘅）一分子。澳洲國會2020年中邀請澳港聯出席一個有關Magnitsky Act既（嘅）網上公聽會。澳港聯就邀請Max一齊出席，佢從來冇成為過澳港聯發言人，最多只係用一個澳洲籍香港人身份發言......想問點解《加山》會形容佢為『香港的代言人』？」
「危險人物」？ 「手足」譏得個講字
針對《加山》形容莫熾韜係「危險人物」，話佢參與過街頭所謂「勇武抗爭」，Edward就話：「以我所知，佢（莫熾韜）係（喺）Poly（理大）一役之後先由澳洲返香港。但係咁，Poly（理大一役）後因為×肺（新冠肺炎疫情）同前線流失，街頭抗爭已經少之有（又）少，唔通同流浮山啲刀手一樣，得個講字？」
Edward之後仲明言：「唔該你唔好將唔屬於你既（嘅）光環強加落自己到（度），再去成就你既（嘅）野心......唔係將你做過既（嘅）少少野（嘢）無限放大，咁就扮得黎（嚟）架（㗎）。」
唔少「手足」都鬧爆《加山》亂封「勇武」。「影×Bot」喺tg群組「饅頭channel」咁話：「《加山傳播》唔好×以為寫個本人立場不代表本台立場我就唔××埋你地（哋）呢班濕×媒體，有一位人（仁）兄，佢係（喺）澳洲想參選國會議員，並以香港人作招徠！」「前年兩大戰爭後，你先返黎（嚟）香港，你同我講你係勇武，勇乜×野（嘢）武！」
「一秒醒神」就喺連登咁回應：「dun make stupid people famous（勿再吹捧傻仔），條友IG 200fol都冇！」
●香港文匯報記者 黃書蘭