話唔做晚市嘅係黃店，捱唔住執笠同跪低開返晚市堂食嘅又係黃店，咁矛盾嘅行為藝術，黃絲又要點消化？唔少黃絲不惜打臉叫佢哋開返晚市堂食，亦有黃絲怨天怨地問點解，更加有黃絲認為根本唔使同政府鬥，留返條命最重要。係囉，其實黃店做咩要自己鬥死自己啫？
黃店「燒房焗」日前喺facebook出post話自己「收爐」，網民「Wong Suet Nam」問︰「唔係好明？係意思你哋間舖要執？」「燒房焗」唯有認係，「Wong Suet Nam」就話︰「吓...... 哎呀......其實你哋做返晚市啦，冇人會怪你哋㗎！」
「壹碗壹碟」本月初宣布大角咀店月中「正式結束營業」，啲黃絲亦都馬後炮咁話︰「唔好啦，做返堂食吧，已經超額完成了。」唔少黃絲就怨天怨地，「Helen Cheung」反問︰「一年唔夠呀，點解呀？」
藍店搬大舖 黃店幾難捱
有啲黃絲講下講下仲揭埋間店嘅傷心史，「CK Wong」話︰「你話間鋪（舖）上手係藍店，頂左（咗）佢黎（嚟）做就少一間藍店。」
「GiGi Poon」就踢爆佢哋所謂嘅藍店明明就做得好好︰「其實唔關隔涉事掛（啩），都好近滙豐中心，上手做到轉大鋪（舖）。」「Yvonne Lui」亦話︰「上手果（嗰）間仲存在係（喺）其他位置呀陰公。」原來結果佢哋眼中嘅藍店冇少到，黃店就少咗一間。
至於啲話捱唔住而要重開晚市堂食嘅黃店，黃絲都幫佢哋鋪好下台階。「Roy Lau」話︰「很理解，無謂同d（啲）×街×政鬥氣，留住條命，笑到最後，才是贏家！」
其實黃絲咁樣自編自導自演自執笠或跪低硬撐，到底為咩呢？●香港文匯報記者 甘瑜