有啲黃絲KOL久唔久就會出嚟試水溫，絕對唔會放過任何一個可以cap水嘅機會。好似上年因涉嫌違反香港國安法而着咗草嘅「攬炒巴」劉祖廸咁，佢最近就聲稱自己將會辭職，全力為香港服務，揚言會用一至兩年時間去推動「國際倡議」、「國際動員與傳承」，以及發展「香港民族實業」三大範疇嘅工作，仲煽動班黃絲快啲科水支持�嘅大計劃。
fb專頁「無神論者的巴別塔」日前就出post回應，話對「攬炒巴」走上課金之路感覺有啲黯然。點解？因為「攬炒巴」幾個月前先大大聲話自己自從俾「與港同行」（Stand With Hong Kong）踢走之後，一蚊課金都無收過，又話自己有專業資格，不存在呃錢嫌疑云云，當日企喺道德最高點，點知今日都係要墮入「塵世」。「無神論者的巴別塔」就形容：「課金系統就好似街頭賣藝，有人Buy你果（嗰）套肯比（畀）錢就無問題，而唯一問題只係你呃人賣假貨，外人就有權踢爆你。」佢仲語帶諷刺咁話：「你話籌旗救『手足』、『打國際線』，點知收到課金就落格、走去炒股或者自己風流快活，呢啲就係呃人。」雖然無指名道姓，但係呢番說話真係令人想入非非，到底係講緊邊個呢？
對於「攬炒巴」話要進行三大「任務」，「無神論者的巴別塔」就話：「老實，吹到咁大，真係令我往後好難唔監察你。」佢仲話𠵱家班「國際線KOL」，成日話自己見呢個嗰個政要，結果幫香港爭取咗乜嘢番（返）黎（嚟）？世界各地舉行咗啲乜嘢「民族集會」，又有幾多同班「國際線KOL」有關？佢又針對「攬炒巴」所講要發展所謂嘅「香港民族實業」，直頭係講緊做生意，並且質疑「從來只聽過猶太人搞實業發咗達後資助番（返）以色列復國運動，從來（無）聽過有人靠課金要人打本比（畀）你做生意發達」，加上「攬炒巴」乜嘢說服介紹都無，究竟佢搞緊嘅係「民族實業」定係種金騙局，根本無人會知。
促向公眾解釋啲錢拎返嚟點用
不過佢最尾都提到，𠵱家「攬炒巴」都只係喺籌款階段，絕對唔會一開始就打死佢係呃人錢，但一如之前所講，目標吹得愈高尚偉大，就愈有責任向公眾解釋究竟啲錢拎番（返）黎（嚟）會點用，佢仲話希望一年半載後再提「攬炒巴」時，唔會喺前面加「騙徒」兩個字上去。
對於「攬炒巴」今次嘅「鴻圖大計」，網民就似乎唔多歡迎，「Kwokchun Cheng」就批評：「嘥×氣，以前啲人搞革命係去外國籌錢返嚟做嘢，而（𠵱）家啲『國際線』調返轉，喺外國呢啲自由地方生活，仲要攤大手板問受緊苦難嘅香港人拎錢，佢都講到明課金係畀佢『糊（餬）口』啦，根本唔使對呢啲人有咩期望，搵食味重。」「Yan Ting Lam」就話：「話自己『攬炒』、上前線，我都識講啦！去外國乜都講得，吹到自己俾人逼（迫）害仲得，等你班傻×送錢俾（畀）我致富、炒樓，得左（咗）！」
曾被黃絲批「攬炒騙徒」
其實網民有咁嘅反應真係唔出奇㗎，因為「攬炒巴」過去都淨係得把口，無做出啲咩「成績」之餘，仲成日衝出嚟「抽水」、「收割光環」。好似佢喺上年底就話要發起所謂嘅「金融攬炒」，話要一人一信狙擊「螞蟻千億IPO」，幻想咁樣就可以搞到人哋上唔到市。雖然咁啱得咁蹺，螞蟻集團最尾真係未能成功上市，不過大家都知道根本就唔關「攬炒巴」事，但一向厚面皮嘅「攬炒巴」就罔顧事實，第一時間出嚟「收割光環」兼認叻，搞到一班黃絲都頂佢唔順，批評佢係「攬炒騙徒」外，仲幫佢改咗個花名叫「攬鈔巴」，話佢拎「手足」啲錢喺泰晤士河度風流快活，到底「游說」咗啲乜呢？亦都有連登仔睇唔過眼，批評劉祖廸「當全香港黃絲都係弱智」。
不過「人一黃，腦便殘」嘅講法又真係無錯，即使「攬炒巴」多次俾人篤爆係呃錢，但總有啲盲目嘅黃絲唔理三七二十一，一見到有眾籌就即刻撲去課金支持。真係難怪班黃絲KOL久唔久就以各種理由籌款，成班「黃絲」水魚咁款咁喎，唔呃佢哋呃邊個呢﹖ ●香港文匯報記者 倪思言
