攬炒派區議員口就講「齊上齊落」，但一出事就大難臨頭各自飛，「手足」秒變「手joke」。近日有網民似乎忍受唔住一直俾人呃，決定喺連登討論區度大爆攬炒派元朗區議員張秀賢嘅劣行，話佢借錢唔還之餘，仲打算走佬走數，食盡人血饅頭咁話。
連登網民「刀仔鋸大樹∼」日前以「元龍選區居民表示：×你老×張秀賢」為題出post，嬲爆爆咁話：「你（張秀賢）自從當選以嚟，不停問你班義工團隊以各種名目借錢，東借一忽、西借一忽，集腋成裘，本來都冇諗住爆你出嚟，點知你夾夾埋埋借左（咗）7位數，準備成家移民走佬走數？你對唔對得住班手足啊！」佢仲指責張秀賢「成日喺度食人血饅頭，之前代購啲越南口罩質量又差到仆×，中間又食唔少夾棍。」
「刀仔鋸大樹∼」同時質疑張秀賢眾籌款項去向，話佢上年以「支付誹謗案相關費用」為由舉辦眾籌，但所得嘅十四萬七千幾港元就唔知去咗邊，當初張秀賢所講嘅3個月公布一次財政報告又完全唔見咗影。而睇返張秀賢fb，又真係無見過佢提任何財政報告喎，咁到底啲錢去咗邊呢？真係令人好懷疑囉。
大部分黃絲盲撐 唔願睇清真相
雖然「刀仔鋸大樹∼」好努力咁陳述一件又一件事去證實張秀賢嘅劣行，但係大部分黃絲就懶理佢所講，仲攻擊返佢係「五毛」，不斷扭曲佢嘅目的係要分化大家。難怪當俾人呃時，黃絲依然會選擇繼續盲撐啦，因為佢哋根本唔願打開眼睇清真相，「蠢黃」呢個名真係十分配合佢哋。 ●香港文匯報記者 倪思言