●「612基金」近來頻頻因為乾塘告急，4月份預計開支或籌唔夠數。 「612基金」網頁截圖「連登仔」開post叫人捐 有人話「寧願留返啲錢吃喝玩樂」
俗語話「橋唔怕舊，最緊要受」，但同一條橋用得太多次真係冇人會受。2019年聲稱支援「反送中」被捕者而成立嘅「612人道支援基金」，每次宣布乾塘後都會迅速籌到逾千萬元，點知根據官網提供嘅最新資料，「612基金」4月份1,500萬元嘅預算開支仲未籌夠數。有「連登仔」近日開post提醒大家捐錢，竟然發現原來唔少人都杯葛「612基金」，有啲黃絲寧願留返啲錢吃喝玩樂都唔會捐畀「手足」。到底應該話啲黃絲涼薄，定係讚佢哋終於睇穿攬炒派嘅伎倆呢？等緊「612基金」支援打官司嘅「手足」又應該點算好呢？●香港文匯報記者 雨航
「612基金」因為乾塘而告急嘅次數已經多到數唔晒，燒錢速度令人驚歎。根據官網資料，截至3月底基金嘅可動用結餘得返143萬元，喺得到8,065人捐款後已達9,407,719元，但距離1,500萬元嘅目標似乎路程唔短喎。
記得黃絲喺黑暴期間不斷強調，佢哋代表「200萬人」嘅聲音，相信冇捐錢嗰199萬人一定係有「苦衷」！
網民斥「612律師」叫「手足」認罪
「重口味名士」近日就喺「連登」開post提醒各位黃絲捐錢，點知有網民即刻反對，好似「被拜登選中的細路」就話：「我係唔會比（畀）錢叫啲『手足』認罪既（嘅）所謂律師。」
「棉花球」就反駁：「律師睇過有冇勝算先叫人認罪，我識人因為『612（基金）』幫佢請律師打甩咗點會冇用？邊×個律師亂叫人認罪開名講出嚟，唔係你就咪× up分化。」
「被拜登選中的細路」再回應：「即係認有人叫認罪啦，我識人就係（喺）6（月）9（日）衰左（咗）比（俾）個律師叫佢認罪，名我梗係唔會開，不如你係（喺）度開哂（晒）你全家名呀on ×。」
點解有人話「612基金」搵嘅律師會叫人認罪？事緣「獨立音樂人」霍朗齊幾個月前喺fb爆料話：「有啲知名大律師真係好×街，由前年開始不斷接『逆權事件』被告案件，然後叫哂（晒）啲唔出名嘅青年認罪。」霍朗齊當時拒絕網民要求公開相關律師嘅名，但就話：「官司輸贏唔關『612（基金）』事，加上佢哋幫咗好多人。」唔知係咪間接證實叫人認罪嘅律師，都係「612基金」請返嚟呢？
網民：認罪使鬼用你班律師？
「麵咪媽」就喺該「連登」post揶揄「612基金」啲律師：「叫人認罪，自己就正常生活，有閒錢就買『贖罪券』，送錢畀政府打×義士。」「月山下」亦話：「認罪即係輸，輸咗要畀堂費，真係『養肥』政府。」「十月五」就好勞氣：「認罪洗（使）鬼用你班律師，用你地（哋）就係要打甩佢呀。」
「頑強持有」就慨嘆：「成班人淨（剩）係識講不割蓆（席），同上同落，嬴（贏）就一齊嬴（贏），輸就一齊輸，但力就『手足』出，監就『手足』坐，自己就繼續係（喺）度吃喝玩樂，連捐下（吓）『612（基金）』幫『手足』比（畀）律師費都當睇唔到。」「『連登仔』仲好意思平時係（喺）度鬥黃，今日批鬥完黃店，聽日就批鬥下（吓）公務員，後日再批鬥下（吓）『泛民』，講到自己係最×黃，但原來連課金少少付出都唔肯。」