咩叫唔知醜字點寫，佐敦南區議員陳梓維敢認第二，相信都無人敢認第一。陳梓維噚日喺社交平台fb上發文，宣布自己將會宣誓留任區議員一職。曾經因為唔識字而被譏「梓維體」嘅陳議員，今次就識得「參考」人哋嘅聲明，結果喺無秘密嘅今天，好快就有網民發覺，佢帖文所用嘅字眼同另一個區議員嘅聲明幾乎一模一樣，更揶揄佢做緊「句子擴張練習」，但都有人好「錫」佢，覺得叫佢寫百字文章，簡直係強人所難。好心呢個有「心」冇力嘅陳議員仲要「留守社區服務」，可憐班揀咗�嘅黃絲要繼續享福囉。
陳梓維喺帖文中稱自己決定宣誓留任，「服務社區」至任期屆滿。佢聲稱，自己參選時已簽署擁護基本法承諾書，如果特區政府加設宣誓要求，自己亦願意配合，又稱考慮到2019年區議會選舉時，自己對選民作出嘅承諾仲未實現，因此決定宣誓。
不過，有網民就發現，陳梓維嘅帖文同屯門區議員朱順雅嘅留任聲明竟然高度相似，兩人不約而同用上「宣誓一事，本屬不必」「考慮到2019年競選連任時，對選民作過的承諾，故決定宣誓留任，直到本屆任期完結為止」「卸下區議員公職後，我會繼續留守香港，與香港人同行」，同埋「時勢艱困，大家珍重」等字句。
被網民寸後刪留言
見有古怪，「Kimkam Chan」就喺陳梓維嘅帖文下貼上朱順雅嘅聲明，有媒體就見到當陳梓維俾人踢爆後，佢索性直認不諱咁回覆話：「我『參考』佢。」「Hung Pak Cheung Fredie」見狀就留言諷刺問：「句子擴張練習？」但面皮幾尺厚嘅陳梓維仲自爆：「上次嗰篇不參選聲明，都係『參考』人哋。」但有關留言喺幾個鐘後就已經無法查閱，唔通陳梓維都覺得自己離譜得滯，所以急急「毀屍滅跡」？
唔少網民見到陳梓維抄襲聲明嘅行為都O晒嘴，「Jeff Ser」就話：「能夠做到區議員，絕對係奇蹟一個，咁點會輕易放棄呢啲收入呀。」
「要佢寫100字係強人所難」
「Cheung Sally」就暗諷：「要維維（陳梓維）寫一百字文章， 真係強人所難。」「Wai Hoi Ying Cecilia」仲話：「佢仲要抵死到話參考果（嗰）下（吓）先funny。」「JA NI CE」就批評埋有份投佢票嘅人：「佢宣誓都係為份厚薪，佢能力不足服務唔到區內市民，錯不在他，應該係投佢票嘅市民，而（𠵱）家佢哋自己受番（返）晒。」
陳梓維嘅醜事又點只得一單咁少吖。今年新年期間，雖然陳梓維人喺香港，但佢就對外公布議員辦事處會由年廿九（2月10日）暫停開放至正月十八（3月1日），足足放成19天長假，仲係fb聲稱「初一至三的確需要放假拜年，初四先回覆大家」。以為佢得放假唔做嘢就太天真，人哋返工時都一樣唔做嘢㗎，年初時佢就自爆收到街坊嘅污水渠滲漏投訴，但由於聯絡唔到法團，所以佢直情將個案轉交畀競選對手佐敦南前區議員、民建聯副秘書長葉傲冬，仲懶叻咁話自己個方法係「一種無人會用（嘅）方法」。做區議員做到佢三番四次咁出醜，難怪市民都頂唔順狠批佢無能，更加有人話：「思疑佢係弱×。」 ●香港文匯報記者 鄭治祖