●黃偉賢及朱凱廸近期喺《星島日報》刊登道歉聲明，承認曾作出失實言論。麥美娟 fb截圖黃偉賢朱凱廸登報認衰 郭偉强促立法嚴打假資訊
攬炒派成日大話連篇，放流料煽動仇恨。元朗區議會主席、民主黨黃偉賢同前立法會議員朱凱廸前年7月先後喺網台同社交平台老屈工聯會立法會議員麥美娟，話佢讚元朗鄉親驅趕示威者，同叫示威者做「曱甴」，麥美娟喺同年8月委託律師正式入稟法院告二人誹謗，要求佢哋道歉。不過，黃、朱兩人拖到噚日先突然登報道歉，令事件搞咗近兩年先真相大白。工聯會立法會議員郭偉强噚日就喺facebook話：「唔想香港變成假資訊苦主中心，就要快快立法打擊假資訊。」●香港文匯報記者 黃書蘭
麥美娟噚日喺fb上載咗黃偉賢同朱凱廸喺《星島日報》刊登嘅共同道歉聲明截圖，黃偉賢喺聲明聲稱，當時因為「記錯」麥美娟嘅言論，而向公眾同傳媒「引述錯誤的內容」喎，「本人承認做法不適當，並就此公開向麥美娟議員至誠道歉。」
朱凱廸就承認冇求證黃偉賢引述嘅言論之真假，「在本人個人社交平台專頁製作圖像及宣傳單張轉述失實言論，並廣泛發布，誣蔑（衊）麥美娟議員。」他承認自己做法極不負責任，嚴重影響麥美娟嘅聲譽，「本人就此鄭重向她致歉。」
不過，朱凱廸只喺自己社交平台發布，道歉又唔見擺上社交平台，有幾鄭重，真係交畀大家判斷嘞。
麥美娟：兩人近期主動提和解
麥美娟噚日回覆香港文匯報查詢時就話，案件本來已預咗交畀法院處理，但對方近期突然主動提出和解，經過連番商討後，最終雙方日前達成和解協議，但具體內容就不便透露。
郭偉强譏黃朱被告到「甩褲」
對於有攬炒派喺「斷正」下都要拖近兩年先至「跪低」，唔少人都認為事件法例監管不足，令造謠者道歉得「太遲」。好似郭偉强就話：「道歉只係因為被人告到『甩褲』，『黑暴』的假文宣仍然入心入肺，又豈是道歉就會叫得醒！而且睇慣假資訊的讀者，都接觸唔到道歉啟示（事）。正如我之前所說，『澄清』『僻（闢）謠』的工作，極花時間、程度、專業成本，遠遠多於造謠咀（嘴）舌之力，唔想香港變成假資訊苦主中心，就要快快立法打擊假資訊，制止黑暴及外部勢力的陰招。」
「YF Luo」亦話：「絕對是虛假抱歉的，兩年才道歉，太遲了！」「Kin Wong」都話：「為求自保而道歉。」
網民：黃應引咎辭職
唔少網民就質疑點會咁啱「記錯」完全冇講過嘅嘢，「Derrick Ng」鬧黃偉賢：「點會『記錯』，抹黑就真！」「Kit Yin Wo」就話：「真的假不了，假的真不了！作假的，還好意思做區議會主席！理應引咎辭職！」
有網民就指事件反映黃絲篤信謊言嘅荒謬。「Sing Chan」話：「整個黑暴悲劇，源於『違法達義』說及不斷的謊言！」