●「勞工組」指有黃店「分兩個月出一日試工錢」。 fb截圖黃店衰嘢一籮籮，把口叫人「手足」，實質就當人「老襯」。好似攬炒派勞工團體「勞工組」噚日就喺facebook發帖，爆粗鬧有間做飲食業嘅黃店要求職者先「試工」一日，返成12個鐘後唔請人不特止，仲要將人哋一日糧分兩個月出，兼夾要爭取一輪先攞得足份糧。有網民都勸啲黃絲：「各黃店管理層或黃HR（人事部）如果連自己公司既（嘅）不合理制度都無勇氣行出梨（嚟）改變，咁不如開開心心做藍絲啦。」
「勞工組」噚日喺fb以「分兩個月出一日試工錢嘅黃店」為題發帖，話收到一單求助，不吐不快喎。事緣有個苦主上月26日返飲食業一份工，要先「試工」一日， 時薪45蚊，返足12小時，最後不獲錄取。間公司今個月7號先畀返當日工資，到拎支票嗰日，苦主發覺計少咗兩個鐘，「公司HR解釋指事主『無拍卡收工』，『公司政策』係唔會問清楚店長／事主的，只會一律當10小時糧。而事主100%肯定有拍卡，到底當中邊到（度）出錯亦都無從得知。」
最終幾經辛苦，HR證實到苦主係返足12個鐘，先可以爭取返應得嘅人工，但要HR話要等到下個月（7月）嘅糧期先出返糧畀佢喎，「到時候仲要過去簽收支票！」
根據《僱傭條例》規定，僱主要喺僱員離職後7天內支付任何未發放嘅工資，但事主今次卻要俾黃店一日糧分兩個月出。「勞工組」就鬧間黃店：「我真係想問間公司係唔係痴（黐）×左（咗）線？」
不過，「勞工組」今次雖然發帖叫間黃店「見字出糧」，但就冇開到間黃店名。
網民鬧爆黃店亂出糧
唔少網民都留言鬧間黃店擺明呃「手足」。好似「HR熱血男」就問：「『公司政策』係唔會問清楚店長/事主的？咁HR亂出（糧）都得？」
「Cheuk Hang Shing」就答：「咁都講得出，咁佢不如話員工（返）12個鍾（鐘）頭冇做足12個鐘既野（嘅嘢），所以唔會出足咁多（個）鐘呀。反正都係任佢up（噏）。」「Tom Tak Chun Chan」就話：「加埋都係540（蚊）咪×玩×打工仔啦！」
有「手足」都話好多黃店都係一丘之貉。「Leon Ng」話：「老實講句，幾×多無良黃店呃×手足？」其實佢哋咁肆無忌憚，又係邊個縱（容）出嚟呢？●香港文匯報記者 黃書蘭