●C AllStar表示今次開騷無論台、燈、聲和服裝都是最好的。香港文匯報訊（記者 李思穎）C AllStar將於7月24至25日假紅館舉行演唱會，上星期信用卡優先訂票，門票火速售罄，為他們注下一支強心針，同時亦帶來飛債纏身的煩惱。
釗峰謂：「陸陸續續好多朋友買唔到飛都打電話嚟搵我訂飛，我有好多飛債呀！」吳崇銘（King）安慰他：「其實唔使咁驚，因為仲有公開發售嘛，仲有機會買到飛。」釗峰呼籲：「唔好問我有無內部飛，去售票網站撳F5啦！」原來他所指「F5」是電腦鍵盤的「重新下載」功能鍵。釗峰對媽咪都一視同仁，他雙手合十，一臉可憐地向媽媽道歉，然後就叫媽咪上網撳飛。
門票緊張，釗峰笑言好奇King和Jase如何安排多位紅顏知己的座位？他問King：「你啲妃嬪係咪四面台分四邊坐？如果咁啱坐埋同一行點算？」又問Jase：「你啲Baby Girls又點分布呢？」King即刻拉埋釗峰落水，笑言：「我啲妃嬪就會坐喺你啲妃嬪隔籬。」陳健安（On 仔）懶理三子講到嘻哈大笑，他認真地用手指檢查釗峰胸肌說：「我幫大家Check吓啲質地，釗峰硬咗喎，做過咩嚟？」身旁King有樣學樣，篤完釗峰又篤On仔胸肌，再篤自己比較，然後一臉權威地說：「釗峰又未夠On仔咁硬！」四個大男孩為胸肌議論紛紛，原來他們為了配合今次演唱會服裝備戰，King說： 「大家練咗咁耐，當然會有啲服裝可以展示成果。」