|
智經研究中心公布民調，指7成家長支持校園驗毒計劃，力撐特區政府。原來，智經主席胡定旭除了啟動數據研究外，近期還落區「夜蒲」，親身了解「索K邊青」的心態。
肥胡坦言，眼見有後生仔本來讀書叻又靚仔，但濫毒後連講說話都結結巴巴，成個人「渾渾沌沌」無精神，令人好傷心。他慨嘆，K仔禍及不少年輕人源於價錢平，「10幾蚊有一包，唔食一餐飯已經可以吸食，但背後的代價真係好大，索K對腦部及腎部的傷害係永久性的，危害終身的。」上周他參與一個家長會活動時，近40名家長無一反對驗毒計劃，足見不少家長心情同樣焦急。
肥胡坦言，理解校園驗毒計劃是新事物，社會對此有不同聲音，落實推行難免需要時間，但自己最希望計劃即刻上馬，免得更多年輕人誤墮毒海，抱憾終生。 ■本報記者 曾少妍
|
