|
李自明
2012年兩個選舉辦法修訂的諮詢文件下周揭盅，自明近日與政界友人飯聚時，話題亦不離「捆綁」、「翻叮」、「優化」幾個政改「潮語」。政壇中人笑指，以坊間流傳的優化方案而言，推動民主進程的「橄欖枝」已然伸出，關鍵在於反對派願不願意接招，尤其溫和成員是否有足夠的道德勇氣：「如果佢哋堅持要鑽普選牛角尖，唔肯聽取主流民意，而係再來一次捆綁否決，咁幾好的意願、幾有誠意的方案，都難逃05覆轍，到時香港市民又會點睇佢哋呢？看來佢哋都應該計吓數啦！」
民主發展步伐 應有機會「升呢」
香港政局風詭雲譎，反對派打何算盤更決定民主進程能否「升呢」，雖然23個議員暫時仍堅持做「口硬派」，漫天開價，大有等政府落地還錢之意，但政壇高人今番卻相對樂觀，認為「前進一步」的機會應大於「原地踏步」。
自明追問高人見解的基礎及理據，他先說當局要發揮「無限想像力」及「高度智慧」，尋找與溫和反對派的「match point」(決勝分)，皆因反對派中亦不乏走溫和路線之人，並深諳政治妥協之道，當局若能「逐個爭取」、「分頭擊破」，或能突破現時困局。
優化「區會方案」 白鴿黨有着數
他並逐個拆解反對派政黨的「三思而後行」，笑指白鴿黨（民主黨）不僅在總辭議題上「放軟手腳」，部分議員的取態亦相對溫和，黨內「千年老二」更是見獵心喜，「大把協商空間」：「白鴿黨如果真係行議會政治，就要『擴權』，權來自何方？來自議席，話晒有咁多年的地區經營，實力唔差，當局增加區議會立法會席位，白鴿黨絕對有能力進一步提升佢効立法會嘅叫價籌碼！除非條數佢都唔識計，係要攬住『即時普選』嘅神主牌啦，但咁做分分鐘傷筋動骨，唔止黨內嘈到拆天，對外民主寸步無進，佢哋都好難向選民交代。」
總辭變「爛尾樓」 公文袋有偈傾
再說公文袋（公民黨），政壇高人坦言，公文袋大狀見白鴿黨「放晒飛機」，也趁勢在總辭上縮沙：「當局想將公文袋啲意見放入諮詢文件度，朗尼湯（湯家驊）好似執到寶咁舌累飯應，可知班大狀唔係完全冇得傾，但公文袋自視elite（精英），難免有政治arrogant（傲慢），加上佢哋又冇乜地區實力，攞唔到區議會議席，反對優化方案冇成本，當局看來要諗個靚靚嘅下台階畀佢哋，等班blue blood（藍血）不失道德高地嘅face，又可以相對漂亮地謝幕！」
反對派激進派「寸土不讓」，高人直言意料中事，更批斷癲狗幫（社民連）不止「冇彎轉」，更必定會使出狠招「炮轟動搖者」、「標籤溫和派」：「最怕佢哋好似鯊魚咁，聞到小小血腥味就狂噬，或者發動極端支持者實行獵頭行動『捉內鬼』，將班溫和派扣上民主叛徒大帽子，逼到人哋冇退路！」
勇敢順應民意 勿重蹈05覆轍
回想05年的教訓，高人嘆息道，其時不僅反對派「興獵頭」，不少傳媒也愛「捉奇拿」，有人更披上「支持民主外衣」，進行「政治道德審判」，故方案雖有6成主流民意支持，但溫和反對派最後為免被指「出賣民主」而選擇捆綁否決：「要避免翻叮否決，看來大家都應該心平氣和，理性咁去討論諮詢文件，真係傾個共識方案出來，市民都想見到香港民主向前行多一步，如果個方案得到主流民意支持，溫和反對派都應該有道德勇氣，唔好因為怕俾陣營中人鬧，就退入意識形態嘅保護殼！有時你以為個殼安全，其實好危險，民意就係最好的警示！」
|
