|
李自明
甚麼是最符合香港社會實際情況及循序漸進原則的政制發展方案？似乎坊間乏人談論，輿論的話題多數繞着反對派的「總辭」打轉，而白鴿黨（民主黨）是否參與更是焦點所在。有政壇老友向自明坦言，白鴿黨此番內外交困，實種因於反對派的「捆綁」策略，可謂自作自受，而唯一解困之道，就是好好思索自己應該向誰負責：是其他舉起「民主塔利班」旗幟的反對派政黨，還是那些支持白鴿黨的選民？「既然佢哋自己做嘅民調都顯示，大部分選民唔支持『總辭』，佢哋就應該有足夠嘅政治道德勇氣，向公文袋（公民黨）同癲狗幫（社民連）說『不』！」
政壇老友坦言，白鴿黨不想參與「總辭」，卻又不肯明確表態，完全只因「諗唔通」：「白鴿黨既唔想冇咗普選呢個唯一食糊議題，但又驚俾公文袋同癲狗幫搶咗政改嘅道德高地同話語權，又怕一旦同其他黨派因『總辭』割席，以後効陣營內就冇定企，條數點都計唔掂；即使係支持其他人補選，更驚一過完票，人哋『過咗海就係神仙』，令白鴿嘅地盤票源買少見少，下次選舉分分鐘保唔住部分議席，結果咪船頭驚鬼、船尾驚賊，又點唔搞到班老白鴿舉棋不定呢？」
前怕鬼後怕賊 對總辭不敢表態
政治從來現實，君不見反對派蚊型黨在「總辭」議題上「坐山觀虎鬥」：「佢哋梗係樂見幾個大黨鬥個你死我活，一係冷眼旁觀，一係捧吓你，等你得意忘形，一係口講會支持，但一扯到自己包度，就即刻撇清關係，話一人黨冇作用！連蚊型黨都咁識時務者為俊傑，得閒仲要抽吓水，偏偏白鴿就搞到自己『肉隨砧板上』，被人逼到埋牆角、咬實唔放，仲死撐話唔覺被施壓，咁做簡直係超級笨伯啦！」
政黨各有擁躉 應尊重自己選民
說來，如此困局又的確考起白鴿智慧，但老友認為「解扣不難」，只是「解鈴還須繫鈴人」，最要緊的是白鴿能夠把政黨定位、立黨宗旨想得通透，即究竟白鴿黨是向誰負責，則「死結將迎刃而解」：「民主並非一家之言，政治更是眾人之事，公文袋、癲狗幫同白鴿黨各有擁躉，選民基礎並不一樣，對民主步伐的訴求亦有所不同，何必自己舂個頭埋去，為咗啲漂亮嘅口號、美麗嘅民主外衣，而連立黨根本都有所動搖呢？」
高人指，白鴿只要破解「民主逃兵的迷思」，則在「總辭」取態上根本毋須「綁手綁腳」，皆因民意所向已是他們最大的支持：「佢哋係向其他政黨負責，定係向選民負責呢？既然民調顯示反對『總辭』比支持的多出2成，白鴿應該尊重民意，向選民有所交代。白鴿要諗清楚，大家都自詡為『民主派』，選民點解要選白鴿黨，唔選淨係識空談理想、不顧實際嘅公文袋，亦都唔選激進嘅癲狗幫呢？證明每個政黨都有自己嘅特色，涉及政制發展呢樣重大議題，就更唔應該『玩捆綁』。我就覺得，現在正係白鴿黨為民意攞出政治承擔、道德勇氣嘅時候，要敢於同激進反對派切割、脫鈎，否決『總辭』。」
|
