 放大圖片
■陳偉霆表示都無送咩俾阿Sa，只請女友食餐飯。
香港文匯報訊 英皇電影《紮職》上畫數天，在面對《007》、《寒戰》等強橫對手下，票房超過二百多萬正穩步上揚，前晚英皇電影老闆楊受成就特地借出旗下位於灣仔酒店內的私人會所大搞慶功宴，兼順道為明天生日的詩雅預早搞生日派對。提及前晚慶功宴正值阿Sa「牛一」，男友陳偉霆指為避把守門口的記者，他不方便買禮物送女友。
在前晚慶功宴上，詩雅見到一班戲中的好拍檔如陳偉霆(William)、湯怡、溫碧霞及徐棟偉等推出生日蛋糕時，即開心不已大表感動。而兩位靚女溫碧霞及湯怡即送上香吻予壽星妹，對住蛋糕許願的詩雅更表示希望身體健康、工作不斷！
陳偉霆日前被拍下與女友蔡卓妍(阿Sa)食飯兼見家長，提及前晚慶功宴正是阿Sa「牛一」，問到做男友的有何表示？起初William都支吾以對，但耐不過在場記者唯有說：「都無送咩俾佢呀，咪請佢食餐飯囉。(花都無送？)老闆會送啦，其實我都真係想出去買禮物的，可惜多日來，屋企門口都有記者等，不方便外出，我都知辛苦咗大家。」
William自嘲二打六演員
提到今次新片票房，William就自嘲笑言，對自己這些二打六小演員算係唔錯了，真係多謝老闆借呢個場請大家食飯慶功。William說：「你知啦，老闆拍親都係大片，佢睇完之後就話請大家食飯。(佢唔滿意成績？)咁小演員有小演員的合格程度，而且現在老闆都搵咗我和霆鋒一齊做『消防員』。由『古惑仔』演到去『消防員』好有挑戰性，不過為做好該個角色而特別去做『消防訓練』時就發生『瘀事』。當日我全副消防員裝備咁入去『煙房』體驗，點知就緊張得滯，唔識用包個呼吸嘅喉管，搞到要揮手示意求救，由真正的消防員拖我出去，真係瘀到爆。」
詩雅生日願望工作不斷
記者問明天生日的詩雅幾多歲？她即笑住拍打記者說：「唔好問啦，都差唔多30了好擔心呀！(都仲係2字頭。)擔心做中女、盛女，嚟緊工作方面咩都要安排好先得。(生日願望呢？)入行後一直想搵多些錢然後買樓同屋企人一齊住，不過都仲未做到！(驚做盛女咩？)係呀！都無拍拖好耐了我！(搞個Party順便搵男仔相睇囉！)即係好似Table 8咁？都幾好提議喎！不過都驚籌備唔切，最想都係同屋企人食餐飯囉！(無男仔相約？)我寧願開套戲俾我，拍戲好過拍拖了。」而兩位靚女溫碧霞及湯怡即送上香吻予壽星妹，對住蛋糕許願的詩雅更表示希望身體健康、工作不斷。
而在片中飾演「大家姐」的溫碧霞，對於票房就認為當下對手太勁，「咁對住《007》、《寒戰》，我們都叫做係第三位，我們都知足，而且大家都幾好反應，話無咩冷場」。提及工作，Iren更表示將會籌辦自己的電影工作室，「都會開戲，依家仲睇緊幾個劇本，都想開拍關於異地戀的題材。(自己做埋演員？)咁都會，咁話晒我都係演員，但就會搵些新導演合作囉」。
|
放大圖片
