 放大圖片
■田蕊妮揚言第一次出碟，不容有失。
田蕊妮（阿田）與杜汶澤（阿澤）相識20年，女方曾說過，2人相處就是要互相欣賞、互相尊重。說得出這番話，只因曾經在時代巨輪中有過經歷，一起走過事業低潮及生死，令他們明白到吃幾多穿幾多是整定的。最近阿田更有幸一圓其出碟的心願，原來美夢成真的背後要多謝阿澤「咁無聊」！
周啟生最近的「樂壇癌症論」，引來好大迴響。其實樂壇是否真的患了癌症，筆者是行外人，不敢亂加意見。但總相信只要是唱得之人，總會有知音人懂得欣賞。就像田蕊妮，年初在家中一邊化妝一邊唱黃小琥的《沒那麼簡單》，被老公杜汶澤拍片放上YouTube，網民大讚兼累積有七十多萬點擊率之餘，更令阿田遇到Paco（黃柏高）這位伯樂，造就她出處女碟。「我好鍾意唱歌，果期在家不停唱《沒那麼簡單》，老公仲以為我要登台而反覆唱呢首歌，後來佢把我唱歌的片斷放上網，我仲話咁無聊，點知網民反應出奇好。後來偶然機會下，Paco聽到我唱歌，拍板幫我出碟。」
入行廿年始出首張碟
93年，田蕊妮參加亞視舉辦的《未來偶像爭霸戰》歌唱比賽，憑唱關淑怡的《一首獨唱的歌》奪得金獎而入行，那年她才15歲，可惜之後卻一直未有機會出碟。「小時候家中對我管教甚嚴，父母唔畀我去街，唯一的娛樂就是在家唱卡拉OK，仲要成條村的村民都話我唱得好聽。後來參加比賽，攞到冠軍，但又冇唱片公司同我出碟，咁就成廿年。今次真係要多謝Paco，錄音時找來liveband在旁伴奏，隻碟仲會去美國做混音。今次以翻唱別人的歌為主，因為我睇自己睇得好清楚，第一次出碟，不容有失。所以選擇唱男人歌，8首國語歌、2首廣東歌。錄了成個月，最近也拍了MV，應該下年2月、3月出街。最初入錄音室個心好緊張，錄音室好安靜，靜到吞口水都聽到。監製趙增熹叫我唔好當自己是歌手，佢話一個人最寶貴的是感情，當自己演緊戲咁去唱。」
亞視屬訓練演員好平台
其實田蕊妮說得對，一個歌手或演員有沒有用感情去演出，觀眾是感覺到的。像她今次在《巨輪》中飾演的姚文英，十分爽快、有義氣。其「倀雞英」造型獲不少「高登仔」喜愛，不少網民更讚她穿上工人褲，及長頭髮很可愛。現實中的田蕊妮也毫不造作，最少她毫不介意地在記者面前吸煙，「好開心在對的時間遇到姚文英呢個角色，我成日諗，如果早幾年，遇到這個角色，我會擔心處理唔到。但又或是遲幾年才遇到這個角色，我未必像今次般掌握得咁好，到時我可能做唔到20歲的姚文英。今次從20歲演到50歲，20歲對我來說，演出上沒什麼難度，但40歲到50歲呢個階段，要從細節著手去演出。對於一個演員來說，好睇佢當時狀態，演員本身有過經歷，但你要識攞番出來放在演出上。演員同角色其實是相輔相成的，你把自身的經歷放進去，而角色又可以發掘出你另一面。人去到不同年齡會有不同味道，角色點滴也累積更多層次。同埋自己好慶幸在亞視做過，這是一個訓練演員的好平台。因為在那邊，不論你做成點，都沒壓力。因為在亞視無嘢可以輸，這樣反而令個人更放膽去演出，講對白咪試下用ABC，3個唔同的演繹方法。」
採訪：植毅儀
攝影：莫雪芝
Hair：JamesLee@Hair
化妝：諺瞳.小白
形象指導：鄧麗
|
