 放大圖片
田蕊妮在訪問中提到因為人生有了經歷，令演員做戲時更有味道。翻看阿田這幾年，陪著老公杜汶澤走過揮金如土、日日大魚大肉的富貴人生，又或一沉百踩的事業低谷，去年更陪阿澤戰勝了罕見的「米勒費雪症候群」，這些經歷令2人明白平淡是福，互相包容與扶持，令2人克服結婚7年之癢。
老公搵到錢自己更迷失
今年是二人結婚8周年紀念，亦是他們相識的第20個年頭。「我對住老公有時似朋友，有時似情人、有時似伴侶，好多人會問我佢成日出去拍嘢，驚唔驚佢有咩外遇，我15歲識杜汶澤，99年開始拍拖，6年後拉埋天窗。呢8年有遇到唔開心的事，我選擇留在他身邊，現在雨過天晴。我的夫妻相處之道就是唔去理佢、唔去管佢，好多人話對男人要時緊時鬆，但我唔識，只知道兩個人相處就是要互相欣賞、互相尊重。」
不平的人生路教曉阿田很多很多，她說：「當你經歷多咗，你就知道冇一個人可以管另一個人，這樣倒不如先管好自己。記得結婚初期，阿澤搵到錢，叫我唔好做嘢，我就日日過著闊太式的生活，日日瞓到晏一晏，然後就諗下果日約邊個打麻雀好，又或是去邊度Shopping。但這種攤大手問老公攞錢的日子不合我，那幾年可以說是我人生裡最不開心的幾年，好像迷失了，完全沒有思想。」
阿田又謂：「後來唐基明監製找我到TVB工作，我又再投入這忙碌的生活。大家都知道一拍劇就冇私人時間，同老公相處少咗，見到面都係Say Hi同Say Bye。記得有一日，我真的好累，開工很辛苦，Sent了個短訊跟老公說，我感覺很累，他只不過回覆了一句很簡單的『I know』，那一刻真的眼窩一熱，原來老公係好留意我的。現在我們不是以物質行先，見到靚嘢，諗一諗、望一望，已經滿足，生活就是如此簡單！」
|
