 放大圖片
■郭晉安被讚能帶到劇中對手更容易入戲。
郭晉安在新劇中夥拍出爐雙料視后田蕊妮（阿田）飾演夫妻，對於這位拍檔，安仔有讚冇彈，大讚阿田演戲有熱誠、有火，迸發的火花都是近年少見。
■採訪、攝影：植毅儀 服裝提供：KOYO JEANS
郭晉安在新劇《舌劍上的公堂》演教書先生章四維，性格謹言慎行，與對手田蕊妮是一個明顯的對比。無綫高層樂易玲曾在專訪中說過郭晉安是很好的催化劑，能帶到劇中對手更容易入戲。而首次和田蕊妮合作，安仔大讚女方對演戲有熱誠。
「呢個劇是講我同阿田在公堂上打官司，但監製用了現代打官司數據，加添了整個劇的趣味性。第一次和阿田合作，我會用木去比喻自己，而阿田就是一堆火。一凹一凸，不停畀佢燒，佢要甚麼都可以。」
安仔認為阿田是一個對演戲很有追求、很有熱誠的人，「佢會在未拍攝前拉着我在一旁對戲，近年好少機會和對手在鏡頭後傾做戲，好睇得出阿田心中有團火。大家都做咗咁多年，有時身邊人『畀戲』就會彈出反應，而佢記性好好，火力足夠，推動力大。有時唔係話自己個心沒有了那團火，但也看情況。有時會睇住來拍，當遇到劇本又唔好，導演又唔好，都唔好畀那團火熄。但我都叫阿田唔好下下都畀十成火，要揀合適的時候才迸發，希望她能鬆弛一下。」
鼓勵翠如感受角色
至於另一拍檔黃翠如，郭晉安自言她在有線年代時已經留意對方，知道總有一日會做同事。對演戲經驗尚淺的翠如，安仔希望大家唔好畀太大壓力對方。「好耐之前睇有線已經成日睇佢，知道總有一日會在TVB見。今次合作都好開心，但翠如係新人，自己唔可以在旁講咁多嘢，因為教新人的責任在導演，我不想在旁加把口，令佢雪上加霜，不想令佢亂了陣腳。所以拍的時候我只是不停畀鼓勵，用心去感受角色，給人舒服感覺就可以，也不要太着緊外界的反應。」
教仔女要懂得付出
電視中的郭晉安常給人調皮的感覺，但其實現實中的安仔很穩重，為了一對子女，更放棄北上拍劇搵真銀，寧願留港敘天倫。知足常樂的安仔，留港工作無非是不想錯過一對寶貝子女令山及以雅的成長點滴。對於教育兒女，安仔希望他們懂得付出。「今年囝囝要升小一，面試時多數要見埋家長，今年會留在香港拍劇多，像早前就陪他一起去考男拔萃......現在好多家長小朋友細細個就要佢地上playgroup，以我經驗其實不需要，家長做好自己已經可以。小朋友是一塊海綿，你做咩佢會跟住你吸收。我會告訴他們很多東西都是得來不易，不是攤大手板就會有，想得到一樣東西就要付出。我家實行儲積分計劃，儲分來換玩具，要兒子自己每日儲分，如兒子有一些不好的行為，我會跟他說不會畀分。這方法好work，可訓練兒女懂得檢討、審視自己！」
|
放大圖片
