■黃洋達在facebook風騷稱自己忙於寫政綱。 fb截圖「青症雙邪」游蕙禎同梁頌恆前日俾高院裁定宣誓無效，取消議員資格，邊個最開心？咪就係選舉嗰陣同「青症」有仇嘅「熱普城」囉！雖前「普羅政治學苑」「教主」黃毓民口講「哀矜勿喜」，唔會參與補選，但都拋下一句風涼說話，話自己4年前宣誓時玩嘢，導致「雙邪」好學唔學，要同佢兩個致歉咁話。而「熱血公民」過氣「頭目」黃洋達就更加明顯，話自己寫緊政綱；「城邦派國師」傻根（陳雲）亦都紮晒馬，話「出盡全力復仇」，但無講明係咪參與補選復仇。有親「青症」KOL（意見領袖）就寸「熱普城」對「雙邪」被DQ（取消資格）有3個取態，好似足球投注咁買晒主、客、和，是但開一瓣都贏。
「教主」稱教壞游梁風涼致歉
黃毓民前晚喺彌敦道路中心做facebook直播，其間車來車往，睇見都覺得危險。佢話「梁游雖然不堪，我卻哀矜勿喜」，唔會因為咁而幸災樂禍，唔會參加補選，「普羅」亦都唔會提名任何人參加補選。佢聲稱事件意味「司法獨立正式宣佈玩完」、「『一國兩制』正式宣佈收皮」，又話現時無論真假，講「港獨」都會有罪。
一輪大義凜然之後，黃毓民話自己一早提醒宣誓唔好玩嘢，但係「雙邪」好學唔學，學佢喺宣誓時玩嘢，自己要同「雙邪」致歉。不過，黃毓民好似唔係第一個喺宣誓時玩嘢，唔畀「雙邪」學「長毛」梁國雄㗎？
黃洋達忙寫政綱寸黃台仰
黃洋達前晚則喺facebook咁講：「各位記者請不要狂打電話嚟問我補選意向，我正忙於寫政綱。」佢做節目時，更加風騷到攞同「雙邪」友好嘅「本民前」發言人偉哥仰（黃台仰）嚟抽水，稱特區政府唔單上（想）DQ咗兩個「港獨」派議員，打擊咗「港獨」派，人大釋法民意又無大反彈，最後仲連訟費都贏埋，「今次對政府嚟講，真係無成本，又可以玩嘢，點解唔做？」
傻根亦都講「復仇。出盡全力復仇，否則我們陣營無法翻身」，又批鬥一眾「城邦派」反骨仔，話「青症」有啲議員助理同「啦啦隊」係由「城邦派」過底，「一跳船就走上沉船，認真叻仔。」不過，支持者係咁問佢係咪參選，佢都無正面回應。
三個取態 被寸主客和全買
「熱普城」一單嘢有3個取態，乜咁熟口面嘅？咁似公民黨嘅？親「青症」KOL之一、人稱「黑人」嘅「Takki Ma」就寸道，「『熱普城』有3個取態：主、客、和。『普』是同情，『熱』可能補選，『城』說要復仇。」不過，「熱狗」KOL葉政淳就反駁話，「本青港」（「本民前」、「青症」、港大幫）都買晒主、客、和︰「『青政』放水敗訴、眾籌500萬上訴，『本民前』一個潛水（獨琦）一個食『熱狗』（偉哥仰），港大牲（生）嗌不信香港是法治社會，補選在即，繼續×票。」■記者 陳庭佳