■有「熱狗」用陳年舊圖，惡搞「傻根」掟西瓜呼喚獨琦返嚟。 fb圖片「本民前」去咗邊？自從9月選舉之後，「本民前」發言人獨琦（梁天琦）一直深潛，消失於香港人嘅視野，一係就去歐洲「旅遊播獨」，一係就喺facebook出埋啲九唔搭八嘅post，好似前日佢老友「雙邪」被DQ（取消資格），佢就掛住同佢班師弟妹宣傳，分享咗港大學生會刊物《學苑》嘅「港獨」內容。另一個發言人偉哥仰（黃台仰）嘅「能見度」就好少少，「雙邪」上庭都有旁聽一陣，但前日判決日佢一樣無影，仲因為之前講咗句「宣誓玩嘢無成本」，而俾「熱狗」挖翻出嚟鞭屍。有「熱狗」更用陳年舊圖，惡搞「國師」傻根（陳雲）掟西瓜呼喚獨琦返嚟！
發帖「播獨」唔提游梁
獨琦同偉哥仰早前去咗比利時同英國，分別出席「藏獨」會議同「香港二次前途」講座，仲同「藏獨」頭目達賴喇嘛見面，不過獨琦喺香港嘅「戰績」捧蛋，俾人話佢睇住「雙邪」去死。好似獨琦前日喺facebook出post，寧願分享《學苑》嘅「港獨」內容，都唔肯同「雙邪」背書，引嚟大批「熱狗」圍攻。
「Pui Pui」質疑獨琦對唔對得住喺補選投票畀佢嗰班人嘅期望，「你9月到𠵱家做過乜？6萬幾票你㗎？唔係教主（黃毓民）你×有咁多票？垃圾！」「Kin Wai」就話獨琦個「影武者」梁頌恆被DQ，但佢「仲喺度九唔搭八出status（狀態）。」
偉哥仰喺香港多少少搞作，除咗陪「雙邪」上庭之外，更以「個人身份」同「雙邪」去中聯辦反釋法，但最後都係因為唔肯帶頭衝而俾人鬧。佢仲喺「雙邪」玩嘢當日，講咗句「無成本，又可以玩嘢，點解唔做」，不過𠵱家搞到收唔到科，佢呢句「金句」自然俾人摷出嚟抽水。另外「本民前」喺事後只係出聲明，有「熱狗」就建議「本民前」不如改名做「聲明黨」。
惡搞舊圖叫傻根招魂
雖然就嚟冬天，但西瓜喺網上仍然好常見，因為好多「熱狗」都用西瓜圖片尋找獨琦，有人更惡搞早年嘅新聞圖片，以掟西瓜者背影同傻根非常相似，叫傻根呼喚獨琦返嚟，而傻根無嬲嬲豬到，更話「我堅係做實事，而且腰馬合一」。 ■記者 陳庭佳