■「神駒」分享「小麗老千」被合成為「還款格格」的改圖，暗寸她提出的「免供退保」。 fb圖片「青症雙邪」前日被DQ（取消資格）後，一眾私怨行先嘅「熱狗」熱烈地彈琴熱烈地唱，「無敵神駒」仇思達諗住「是其是，非其非」，「提醒」佢哋DQ呢樣嘢「一不離二，陸續有來」，唔好幸災樂禍，自然俾「熱狗」咬返兩啖。佢之後做返老本行，繼續狙擊人稱「小麗老千」嘅劉小麗，要求「小麗老千」兌現承諾，捐一半人工幫長者，又呃返唔少like（讚好）。不過唇亡齒寒，好多人都覺得同樣喺立法會議員就職宣誓上玩嘢嘅「小麗老千」，係被DQ嘅高危人物，都唔坐得幾耐，捐都係捐些少，更何況佢有走數前科！
批「熱狗」踩「雙邪」反被咬
一向標榜自己「是其是，非其非」嘅「神駒」，前日喺facebook不點名批評「熱狗」，話覺得「雙邪」係「抵×死」而覺得法院判決無問題嘅人，「下次輪到你支持嗰班畀（俾）人DQ嗰陣，唔好嘈喧巴閉就得。一不離二，陸續有來，無人坐得穩㗎。」
「神駒」因俾「熱狗」覺得喺選舉時偏幫「雙邪」，而喺清算名單榜上有名，咁樣暗寸「熱狗」自然要還。其中「熱狗」KOL（意見領袖）之一嘅陳到就話自己份人「好公道」，「我認為判決不公，同時又覺得『青政』抵死」，而「陳亦輝」就叫「神駒」唔好曲解「熱狗」意思，「抵×死同判決無話係因果關係，有啲嘢，你咁聰明又公道，係唔會咁樣講。」
惡搞《灰色軌跡》成功呃like
做生不如做熟，既然喺選舉時狙擊「小麗老千」，「神駒」一狙到底，由「小麗老千」今個月1日出糧開始，每日都「提醒」佢要兌現競選承諾，捐一半人工出嚟幫老友記，前日抵死到惡搞Beyond名曲《灰色軌跡》，將歌詞改做「捐一半人工，何時麻醉我抑鬱，過去了的一切計利息」、「你已騙去一身選票扮作更唏噓，老友記卻此刻充滿淚」等，尋日就寸佢「一日未DQ，一日你都仲係議員，快啲兌現咗選舉承諾先啦，嗰幾萬蚊你都咁肉赤？」又呃返唔少like。
不過，「神駒」前日分享一幅「二創」自貸款廣告、將「小麗老千」個樣key（合成）上去清朝格格嘅改圖時，唔知佢班「益友」係咪覺得重口味得滯，叫佢「講還講唔好貼相」！
■記者 陳庭佳