■古巨基美國演唱會，差點俾歌迷扯到成個坐低。香港文匯報訊 今個聖誕節古巨基去了美國舉行「古巨基我們世界巡迴演唱會」，今次演唱會在之前一開賣就極速售罄，絕對是一票難求。為了迎接聖誕，所以演唱會在當地25號凌晨一點先開騷，一開場基仔就以快歌《爆了》辣㷫全場，跟住更唱了多首經典金曲，觀眾high足全場。
其間基仔在演唱會上大爆自己同古太的情史，更捉了三對情侶上台，對他們進行大逼供，要他們自爆情史，其中一個男觀眾仲唔覺意，爆響口話自己結婚前試過好多女仔，嚇到基仔要連忙幫佢補鑊，幫口同佢老婆講：「係試過同幾個女仔拍拖，先至最終遇上最好的妳！」去到Encore環節，基仔突然從觀眾席出現，現場的歌迷瘋狂擁向基仔，握手之餘仲摸臉和摸身，逼到基仔完全行唔到，要提早返上台，而觀眾亦唔肯返埋位，企於台前唔肯走，更有觀眾太熱情在握手時想扯基仔落台，搞到基仔成個人失平衡坐低於台上。
凌晨四點先完騷
基仔表示在大時大節開騷同大班人一齊過氣氛特別正，不過由於要在凌晨一點開騷，加上美國有時差，都怕捱唔住眼瞓，開騷前特別飲了幾樽能量飲品打底，點知見到觀眾咁high，唱到唔識停，結果唱到凌晨四點才肯完騷。