■《壹週Plus》忽然重提曾俊華昔日叫反對派議員「行開啦」的舊事。 網頁截圖反對派此前表明他們全投曾俊華，是因為對方最能「對抗中央」。不過，反對派最近發現這是「死亡之吻」，分分鐘令他們的「造王大計」失敗。壹傳媒集團創辦人黎智英屬下的《壹週Plus》，昨日突然連發兩文批評曾俊華，係咪試圖為對方「洗底」，就真係得佢自己知嘞！
在曾俊華任財政司司長時，壹傳媒集團旗下的《蘋果日報》及《壹週刊》都鬧爆對方，但到曾俊華參選特首後就出盡吃奶之力力撐，司馬昭之心實路人皆見。不過，在各界鬧爆反對派力捧曾俊華是因為對方「最能對抗中央」後，《壹週Plus》昨日就突然連發兩文批評曾俊華。
扮親民假團結拒搞退保
《壹週Plus》其中一篇報道題為《昔日叫拉布議員「行開啦」 今日鬍鬚話要團結香港》，訪問了因蛋掟曾俊華而被判囚的社民連前秘書長陳德章。陳德章稱，曾俊華對「反對聲音」一向態度傲慢，在選舉期間擺出親民形象，只因投票日近了。
他稱，「最印象深刻係當長毛喺立法會向佢抗議時，佢有一句係長毛『行開啦』。長毛當日係講基層問題，佢竟然可以講行開啦，到佢今日講一句口號，話要團結香港，要希望，要信任時，我覺得簡直係貽笑大方。貧窮長者係社會大多數，你嗰時唔去團結，你今日行出嚟話要團結香港人，你信唔信佢？有人話佢lesser evil，（我）絕對唔認同。佢只不過係粉飾太平、收埋矛盾嘅人。」
另一篇報道題為《曾俊華真係咁好？ 只係大家擺低了對他的批評》，回帶稱「過去9年，『最廢財爺』曾俊華hea做，年年預算案計錯數，赤字變水浸，民生議題無承擔。今次雖然民主黨、公民黨『all-in』曾俊華，但事實上過去多年，主流『民主派』政黨均炮轟財爺是守財奴，不肯派糖紓解民困」。
報道訪問了在2011年參與「反對短視預算案」遊行後堵路而被警方拘捕的「社運人士」周諾恆，「我哋嗰時最不滿係，原本叫佢搞全民退休保障，當初係500億啟動基金，但佢寧願派錢（每人派6,000元）都唔搞退保。佢純粹係庫房多錢時，漏少少出嚟，但政府始終都唔會去承擔公共保障嘅運作，畀少少錢你，你哋嘅問題都係返番市場去解決。」
咦，壹傳媒突然在選舉日前轉死性，由捧薯變成反薯？傻啦！捧薯抗中央蠢到陰謀敗露，梗係要淡化一吓，好似反對派立法會議員近日都唔再講「對抗中央」，而係抹黑曾俊華嘅對手林鄭月娥啦，《壹週Plus》兩篇文，都係殊途同歸啫，你唔係真係信吓啩？！ ■記者 羅旦
