■麥潤培「挑機」私訊范國威，叫佢唔好再於馬鞍山亂掛banner。 fb圖片由「青政雙邪」梁頌恆同游蕙禎被DQ（取消議員資格）而引發嘅立法會新界東同九龍西補選，預計會喺暑假或之後舉行，一眾喺舊年選唔到嘅人自然虎視眈眈。其中舊年喺新界東連任失敗嘅「新民主同盟」范國威（咖哩飯），想捲土重來恨到出晒面，身為西貢區議員卻不停「撈過界」，喺沙田、馬鞍山同大埔等新界東區域蒲頭同掛banner（橫額），就連同道都睇唔過眼。反對派沙田區議員麥潤培（麥仔）日前喺facebook連出幾個post（帖文）狂轟咖哩飯，講到明唔會幫咖哩飯助選，唔好要佢「顧大局」，仲踩到上咖哩飯個facebook，要求唔好再喺佢地頭馬鞍山亂咁掛banner，以免影響市容同阻礙街坊睇路咁話。 ■記者 陳庭佳
咖哩飯舊年喺新界東得票排第十，入唔返立法會，𠵱家佢覺得機會嚟喇，諗住主流反對派都會支持佢做返次「飛雲」，但究竟佢做唔做到，除咗要問過一眾有意參選嘅建制派人士，好似工聯會鄧家彪同民建聯李世榮之外，仲要擺平喺反對派入面同佢有牙齒印嘅人。
橫額遍馬鞍山 叫人「顧大局」
麥仔前日就喺facebook話，有人同佢講「橡膠錶」（鄧家彪）喺佢選區馬鞍山利安邨同老人家做早操，仲叫佢「大局為重」，佢發晒老脾咁話：「今次補選咪叫我顧大局！叫親顧大局者同我死開！顧顧顧！仲難聽過粗口！叫我為飯尊貴（咖哩飯）顧住個飯碗？收皮啦！」佢之後仲講到明，除咗咖哩飯之外，自己只會幫一個「非建制派」參選人助選，包括「本土派」、「自決派」甚至佢之前退咗嘅民主黨（白鴿），「請飯大尊貴（咖哩飯）唔好成個馬鞍山周×圍掛橫額！阻住我睇路呀！見一條我port（舉報）一條！」
電影《賭神》一句經典對白——「後生仔始終係後生仔，都係急啲」，完全可以應用喺「80後」嘅麥仔身上，佢除咗喺自己facebook咆哮之外，仲喺同日用facebook messenger 私訊咖哩飯，話馬鞍山唔係西貢區，唔好知法犯法，為補選而周街違掛橫額，「除了影響市容外更會影響市民的出入及視角，容易翻（生）危險！」仲急到打錯字添。
麥遭反對派大佬電話「打壓」
反對派不時聲稱建制派收到一兩個電話之後就「歸邊」，但原來佢哋都興「午夜兇鈴」呢味嘢。前日噴完咖哩飯一大輪嘅麥仔，噚日凌晨就自爆啱啱收到電話：「又有人同我講：培，人哋都冇得罪你，你做乜搞人哋呀，大家自己友。我講：哦！要我收口就自己友，平時就當我on（戇）××。你都on（戇）××嘅。」
其實麥仔都唔係第一日唔妥咖哩飯，好似喺舊年立法會選舉，佢寧願為「人民力量」陳志全（慢必）拉票，都唔支持同樣由白鴿退黨出嚟、選情一樣告急嘅咖哩飯。而喺前年選完區選之後，佢同幾個退過黨嘅沙田區議員組成「新退黨同盟」，個名完全衝住「新民主同盟」而嚟，上年仲吸納咗幾個退出「新民主同盟」嘅區議員，好似丘文俊、陳兆陽同趙柱幫，明剃咖哩飯眼眉！
