莫雷拉早前被罰停賽兩日期間，騎師王俱由潘頓包辦，翻查最近八次夜賽成績，潘頓例有頭馬進帳，此君可以講係越夜越醒神，故今次谷草八場夜賽，潘頓坐騎別具捧場價值。環顧潘頓今次七匹坐騎當中，角逐第二場四班二千二百米的「實業風采」，今季出賽十五次未嘗一勝但就取得一亞三季一殿成績，勝在本身長期狀態穩定，最近三次在谷草交鋒均獲得第三名，演出尚算可靠，今戰最大優勢是可出戰評六十五分為上限的四班賽，得以落班面對較弱對手，是相隔接近三季以來，首次重回四班出賽，憑住長期在三班立足的實力，大有機會勝回一仗。另一匹潘頓坐騎「美麗皇者」亦要留神，潘頓今季替「美麗」系郭家屢建奇功，絕對係信心保證，「美麗皇者」剛戰轉跑谷草千二米，受制於不利檔位，直路後上如飛最後僅輸個半馬位得亞軍，今番換上潘頓再攻同程，補中機會絕對可以看好。