外號火車潘嘅新一期見習生潘明輝，跑三次馬贏五場頭馬，以佢宜家號召力真係唔憂冇馬騎，當然仲有另一個十磅仔巫顯東，不過，講硬淨程度與潘明輝相比顯然仲有距離，好彩目前潘明輝仲未夠資格喺跑馬地上陣，否則巫顯東出場嘅機會又受到呢位火車潘影響。
今次夜賽，巫顯東師父沈集成有唔少惡馬都倚重徒弟上陣，如「放下自在」、「歐洲之星」及「喜益善」，喺周一排位下午，倉主安排咗兩隻戰馬喺地堂踱步，呢兩隻戰馬分別係由副練丁冠豪踱嘅「琪麟穎」及助手黃國安踱嘅「放下自在」。雖然巫顯東亦在場，但倉主叫佢唔使替「放下自在」踱步，只命佢到寫字樓睇番「歐洲之星」、「放下自在」及「喜益善」近期出賽片段，加以溫故知新。當中「放下自在」上次正是由巫顯東騎得第四，呢隻馬狀態不斷進步，雖然倉主再要巫顯東睇番上次跑法，但人馬經已有過四次合作，相信會越來越合拍，反而倉主重點都係叫巫顯東睇「歐洲之星」上幾次嘅跑法，尤其係雷神所贏嗰場一哩，今次減十磅跑會有利呢隻馬發揮威力。另外一隻「喜益善」，近兩場由羅理雅騎交出一W一Q成績，尤其最近一仗跑一千米，重負一三三磅下依然可以得亞軍，輸俾頭馬「翩翩」接近兩個馬位，大家唔好忘記，呢場「喜益善」仲要讓「翩翩」三磅，所以輸都冇得好講，今戰跑千二米配巫顯東減磅肯定可以增強戰鬥力，上述呢三隻沈廄實力馬均有權報捷，值得作為重心馬看待。
陀飛輪火猛狀態弗
姚本輝馬房日前喺石門翹y功，呢個慶功宴由「奮鬥雄心」馬主搞，筳開五席，有份出席者除練馬師外，仲有功臣騎師田泰安等，席間有談及今次夜馬戰駒機會，成個倉手足都睇好「綠茵風采」同「陀飛輪」。呢一對馬埋門備戰相當積極，喺周一早上，馬房安排呢對馬於地堂踱步，「陀飛輪」由梁家俊踱，「綠茵風采」則由騎馬人何汝華試，兩隻戰馬喺倉主面前踱步，只見梁家俊扯到「陀飛輪」條韁繩實一實，一啲虛位都唔俾胯下馬匹走盞，因為驚匹馬好火得滯走甩，踱步完畢梁家俊猛拍馬頸，似乎對馬匹近態十分滿意。手足透露，儘管今次「陀飛輪」面對一批二班馬，但目前狀態良好，只要正常發揮，陣上冇乜意外之下應該係隻三甲穩入爭霸材。至於「綠茵風采」相隔三個月才再跑，據悉本身冇病冇痛，上仗拚後一直保持正常操練，賽前仲彈過大閘才上陣，雷神肯應承再騎，相信鞍上人眼光，必定有料到，唔好輕視。
帝勝之星加強教閘
今季一出即爆出一○八倍冷腳的「帝勝之星」，只係輸頸位給「勁皇子」，不過，「帝勝之星」自呢次三月十五日跑過後，等待了逾一個月的時間，馬房才替這駒再度安排上陣，原因是積極替牠的閘前反應作出改善，除在馬房內作私下教閘外，賽前經已安排此駒再彈一課一千米直路大閘，希望加強這駒閘前反應，不過進度依然緩慢，故今次用到雷神，希望憑超級騎師之助可以幫一把爭勝。