■林鄭月娥早前出席公民黨黨慶。 資料圖片有人覺得香港社會撕裂好難去修補，啲說話都唔係無道理嘅，起碼反對派入面都仲會因小小事而你鬧我、我插你。好似公民黨（訟黨）上星期黨慶，請咗選舉嗰陣俾佢哋鬧到九彩嘅候任特首林鄭月娥坐主家席，唔少當晚在場同唔在場嘅人眼都凸埋，覺得訟黨轉軚轉得好核突、將之前嘅牙齒印忘得一乾二淨咁話，一講就講到𠵱家。民主黨（鴿黨）副主席羅健熙喺facebook幫訟黨口，話同「世仇」坐低食飯無乜問題，但又好風涼咁話好彩鴿黨黨慶喺選舉之前進行，「免卻了不少煩惱」，即刻就俾「本土派」噬，好似係沙田區議員陳國強同中大學生會前會長周竪峰。訟黨深水埗區議員伍月蘭更加踢爆，鬧佢哋嘅除咗有社民連同「人民力量」中人之外，仲有「工黨」呢個主流反對派同路人。 ■香港文匯報記者 陳庭佳
羅健熙前晚喺facebook出帖，話同「世仇」坐低食飯其實無乜問題，引用咗二戰時嘅英國首相邱吉爾嘅名句「Courage is what it takes to stand up and speak； courage is also what it takes to sit down and listen（站起來說話要有勇氣；坐低聆聽也需要勇氣）」，仲話自己好怕啲人有理無理講唔夠幾句就話人「通敵」、「通匪」。雖然佢先旨聲明「別人政黨的事不好說」，但盲嘅都睇得出佢講緊訟黨請林太單嘢啦！
羅健熙陳國強撻着互插
佢又話鴿黨黨慶喺選舉之前進行，「免卻了不少煩惱」，仲孔明上身（事後嗰隻）咁講，林太當日都有去佢哋黨慶，但只係去酒會而無食飯，「若她來食飯，我們也會安排她坐上主家席，曾俊華、胡國興亦然。」
見羅健熙講邱吉爾講得咁過癮，陳國強就問佢如果二戰時期邱吉爾同希特勒飲酒，前線戰士會點諗，不過羅健熙開咗講歷史呢個頭，竟然咁樣回陳國強：「請林鄭去參加一個黨慶，用到二戰打仗死幾千萬人嚟比喻...... 真勁。」佢仲同陳國強講，如果咁唔滿意當局，「咁你仲攞�啲人工（沙田區議員薪津）？」
陳國強即刻俾羅健熙撻着咗，大鬧對方「廢柴」，話自己啲人工已經捐晒出嚟，而羅健熙就攞奀q商嘅背景窒佢：「咁睇嚟想透過選區議會贏埋選委議席嘅人，大家要有啲家底以便捐出啲人工，唔係唔好做喇。」陳國強亦都不甘示弱，寸收咗「肥佬黎」（黎智英）唔少錢嘅民主黨：「最有家底就是你班友啦！」
周竪峰亦都踩場抽水，話「民主黨賣香港」，但佢好似唔記得自己都身有屎，喺之前中大學生報換莊期間偏幫其中一支莊，而嗰支莊仲派人做對家莊員搵黑材料，難怪「Tin Fong Chak」就寸佢：「快啲又安插吓間諜入民主黨。」
訟黨成員鬧爆「熱狗」式炒作
雖然訟黨大佬冷處理呢單嘢，但班細嘅俾人鬧鬧吓無火就奇。伍月蘭前晚喺facebook呻苦水，話如果「基本禮貌」都當作「埋堆」、「賣港」而大肆炒作，「那些人和『熱狗』也沒大分別」，之後仲抵唔住頸玩踢爆：「連工黨某些人都學埋『熱狗』的行事模式。」
至於工黨副主席鄭司律亦都唔妥訟黨做法，話訟黨咁樣無助改變社會、自損黨格信諾，仲不斷數臭林太同特區政府。