■有人公開爆料話民主黨向其他反對派道歉。 fb截圖民主黨立法會議員黃碧雲，在周三最後一次財務委員會上，提出縮短表決響鐘時間以確保36億元新增教育資源獲得通過，事後被其他反對派中人指責。有網台爆料，民主黨主席胡志偉在前日的反對派會議中為此道歉，而「人民力量」議員陳志全（慢咇）就「證實」有關說法。民主黨副主席羅健熙發帖慨嘆，「大家講團結講信任，轉個頭又將內部事攞出去同記者講要攞尾綵（彩），呢個圈真的令人無言。唉......」
所謂「利之所在」，激進反對派在多次立法會選舉期間一直靠追擊傳統反對派搶票，到選後大家為「壯大議會力量」而扮團結。不過，呢啲都係表面嚟嘅啫，特別係補選近了，激進派自然唔會同傳統派客氣。黃碧雲為免得罪自己取向比較保守的支持者，遂在周三財委會決定唔鬥氣，仲罕有「做好事」提出縮短響鐘時間，讓36億元新增教育撥款，及3間醫院重建、擴建的工程撥款通過，就成為眾矢之的。
李慧玲吹風 「陳朋友」「證實」
不過，黃碧雲其後就成為激進反對派及其支持者追擊的目標，話佢「跪低」、「破壞團結」喎。黃碧雲同佢所屬嘅民主黨之前都在fb發帖辯護今次決定，但其後鬧聲未止，就刪post諗住丟淡件事。網台節目主持人李慧玲前晚更在其節目爆料，話胡志偉前日在「民主派會議」上，就黃碧雲在財委會的所為道歉。
陳志全則在節目上「證實」該說法，更踩多民主黨一腳，話佢哋當初同意只係通過教育撥款，係「同意打這場仗」，即不處理其後的議程，但黃碧雲之後再提出縮短表決響鐘時間，「有啲人覺得其實係『兵變』。」
有傳媒就致電胡志偉查詢，對方就連續三次表示「我無嘢補充」後掛斷電話。
閉門料傳通街 網民：全部係鬼
所謂「你的朋友就是你」，出口「證實」的陳志全，其實係咪就係爆料人，可謂「相當有嫌疑」。羅健熙事後在fb發帖指：「大家講團結講信任，轉個頭又將內部事攞出去同記者講要攞尾綵（彩），呢個圈真的令人無言。唉......」
一直支持通過撥款的教協總幹事馮家強也發帖道：「幾個鐘前，就有一位不在會場的『自決派』成員拿『胡志偉已道歉』來跟我對質，說黃碧雲做錯了。我都唔知。一場閉門會議的內容為何這位外圍人士會知？」
網民「佘雲楚」就慨嘆：「太多人不守會議保密協定，仲講乜嘢公義同道德？......把口就講民主，個八一（意思）就係：『你係民、我係主！』」「Siegfried Lee」也稱：「講過啦，有班人眼中『團結』既（嘅）定義係聽佢地（哋）說話做嘛，咁你一開波已經唔聽話就梗係唔團結架（㗎）啦。......拿我唔係話邊個係鬼，但其實你呢個行頭其實有幾多人唔係咁？」
「Terry Leung」就一語道破：「人係自私既（嘅）。當自身利益被影響當然就犧牲他人保住自己啦！」 ■香港文匯報記者 羅旦