冇咗「熱狗」，真係交都鬧唔成？某程度上係啱嘅。準確啲講，係冇咗「熱狗」，大家網上食花生都未必咁津津有味，因為真係得啖笑。近日，《熱血時報》主持人「法子」一躍成為「課金榜」（神七）嘅榜首（神一），砌低「城邦派國師」傻根（陳云根）。
有「熱城」支持者即刻鬼咬咁聲，話「法子」實力不足，唔少「厹」（狗公）見佢樣好就盲撐，呢種風氣唔健康喎。有「熱狗」就反駁話樣靚都係實力嘅一部分喎，又話網絡欺凌又話盛，結果當然互咬個不亦樂乎啦。
「恩客」課金 升「神一」壓傻根
話說「法子」個節目因為有「恩客」大手課金，而喺前排直上「神一」，力壓傻根。有一班「熱城」支持者就話，呢個排名可能並不能全面反映主持實力，更質疑呢種單睇樣就課金嘅做法係「盲撐」，係「厹」所為咁話。結果？又係「熱狗」搞事，持不同意見嘅「熱狗」就話「靚都係實力嘅一種」，有人更話「佢係靠個樣，有錢就係道理，吹咩」等等。
「網上三國人物」之一「劉禪」就發帖話，「有課金當然值得高興，但千祈唔好又無故造神。......你哋事後反應唔好自己走去鼓吹『靠樣搵食』呢種風氣得唔得？一手推翻自己一直以來經營『實力』的形象，咁樣做對於你嚟講係侮辱你智慧係戇居吖嘛！」
一直撐傻根嘅「藍鳳凰」也出帖話嗰啲撐「法子」嘅「厹」：「政治唔好搞咁多明星，但藝人可以突然紅嘅。......不過藝人如果冇實力，呢個情況唔會長久」。「手作達人」吳斯翹（Billie Ng）就留言稱：「賣樣冇問題。賣樣但唔認才是問題。」
「熱狗」「Karen Chiu」也稱：「假如暢銷書榜第一位係一本搞爛Gag（冷笑話）嘅笑話書，而呢個書榜嘅存在無錯係直接反映讀者嘅質素。而??家我哋提出嘅唔係話搞個書榜出嚟有問題，只係事實上大眾嘅水平真係太低了。當一班聲稱要提高讀者質素嘅作者出嚟對住個榜歡呼，大家又會點睇呢？」
「法子」：對心存惡意者不甘認輸
「法子」就喺自己fb發帖，說自己加入《熱時》以來，「我曾多次考慮退出，因為一些人事、因為一些沒有原由的攻擊及惡意，無論內外我也承受了很大壓力。但天蠍座不服輸，我心底很不願意接受退出這個選項，因為這等同對那些心存惡意的人低頭認輸，我不甘心」咁喎。
身為「法子」師父嘅「熱狗」陳四（陳賢匡）就加把口：「麻煩你下次老早同我講，我唔係要同你共同面對和解決困難，而係要面對共同敵人，並摧毀佢。」《熱時》的第二號人物「英軍」都發帖，話自己有「遠見」，一早睇好「法子」會爆紅，話人哋做咩單單打打喎。
眼見鬧得不可開交，人人都話「熱狗」內訌。「熱狗」前「首領」狗達（黃洋達）隻乸殘獸胃（陳秀慧）發飆道：「乜×都話『熱狗』乜乜乜，嘈乜交都話『熱狗』物物物......真係好很煩，乜嘢人都話係『熱狗』，亂噏亂指，擺明有心㗎啦。連自己同咩人嘈交都要set個稻草人去打，真係有病。」
到前晚，傻根突然上「陳一」，「法子」仲要分享咗有關新聞，貼文道：「陳雲用魅力，陳雲在發射熱力！」唔通想停火？不過，呢首歌原本係用嚟恥笑傻根嗰噃......不過，其實無論點，呢班人唔互相「清算」吓先係奇事啦，唔係普通人邊有得笑啫？大家熱切期望再有花生食啦！ ■香港文匯報記者 羅旦