■的士梁明顯對有關籌款冇自己份感到不滿。梁頌恆fb截圖利字當頭，反對派最叻就反目成仇。從來喺傳統反對派心入面，只有佢哋先叫做「抗爭者」，「本土派」、「獨派」嗰啲就遊行籌款時都可以利用一下嘅。話說噚日傳統反對派成立咗個「在囚抗爭者支援基金」，講到明係支援「13+3」，即係反東北衝擊案嘅13個人同衝擊政總東翼前地嘅「雙學三恥」。唔少激進「本土派」、「獨派」支持者都跳出嚟鬧爆傳統反對派，怒斥︰「『守護公義基金』只守護DQ4（瀆誓四丑），（『青症雙邪』）梁游被『褫奪』議席，唔通就係公義？『在囚抗爭者支援基金』只支援『13+3』，旺角『警民衝突』坐緊嗰班，唔通就唔係『在囚』？定唔係『抗爭者』？改個咁嘅名，會唔會覺得面紅？」不過，亦有傳統反對派支持者直斥，「獨派」等人根本係「民主敵人」。哦，原來係咁。
傳統反對派噚日成立「在囚抗爭者支援基金」，話要支援「13+3」，話因為呢班「抗爭者」因為「牢獄招致的生活困難和訴訟費」，所以要「履行公民社會對抗爭者的責任」。「基金」由公民黨元老吳靄儀、已經離開咗大學嘅傍_強同杜耀明，仲有歌手何韻詩做信託人，聲稱不隸屬任何團體或政黨喎。
佢哋話，要為「13+3」籌400萬蚊，每月就向佢哋每人放1萬蚊「支援金」，仲有日常探訪在囚申請人嘅「支援費用」、相關訴訟而引致的開支或法援「分擔費」等等。佢哋仲話，上月20日所謂「大團結」遊行所籌到嘅253萬元已經全數撥捐咗去呢個「基金」。不過當日遊行吹到「大團結」咁，有啲人係想捐畀「旺暴」中人㗎喎。吳靄儀就聲稱，捐款者係「諗住呢16人嘅」，真係唔知點解佢會知人哋諗乜啦。
「的士梁」畀嬲：唔知講咩好
不過，明顯「青症雙邪」之一嘅（的士梁）梁頌恆已經唔係咁諗，喺fb分享咗上述個「會唔會覺得面紅？」post，直言自己「唔知講咩好......」仲畀咗個嬲以示不滿。激進「本土派」、「獨派」支持者亦留言鬧爆。「Kwokchun Cheng」就喺「基金」facebook專頁到留言話︰「咁就咪×講咩大團結叫人出嚟遊行啦，籌錢之前唔×講定剩係支援『13+3』，×你老×！」「Andy Fung」亦表示︰「吹雞就話不分黨派，支援就剩係幫自己友。你哋係得嘅。」「Lui Tiffany Siu Wah」 亦話︰「呢班人真係好×街。你就抗爭者，人地（哋）就唔係。你就DQ（被取消資格），人地（哋）就乜Q都唔係。又要改個咁嘅名，shame（醜）唔shame（醜）㗎大佬。」
「本土派」：一毫子都唔應捐
「Sword Lam」亦話︰「想『本土派』放低意識形態分歧，同你地（哋）合作，去到搞支援時就將人地（哋）isolate（孤立）在外，係咩玩法？我可以好肯定咁話你地（哋）聽，『泛民』自己一日唔放低分歧，就唔使旨意人地（哋）『不分黨派』咁幫你。我亦都會告知身邊所有人，呢個『基金』只係『泛民』圍威喂，一毫子都唔應該捐，日後補選寧投白票。」「Sam Cheung」更激動話︰「你地（哋）唔鐘（鍾）意依（𠵱）班人啊？『泛民』同政府聯手拉曬（晒）佢地，你地（哋）以後自己抗爭。」
咁其實網路世界上又唔止「本土派」、「獨派」識鬧人嘅，傳統反對派都有唔錯嘅反擊㗎。「Alex Leung」就鬧爆佢哋乞兒︰「戇××，『港獨派』最憎左膠，而（𠵱）家向左膠乞錢？你地（哋）唔×識自己籌旗咩？」「車臣」就話︰「仲未醒？醒未？呢D（啲）（『旺暴』分子）係『民主敵人』黎（嚟）。」 ■香港文匯報記者 甘瑜