■太陽深情獻唱。一家三口捧場 溫碧霞趁機放閃
香港文匯報訊（記者 植毅儀 澳門直擊）韓國組合BIGBANG成員太陽前晚於澳門舉行《TAEYANG 2017 WORLD TOUR [WHITE NIGHT]》世界巡演澳門站。太陽在演唱會上大唱BIGBANG的歌，更表示想起隊友。溫碧霞前晚偕老公、囝囝捧場，問她覺得老公還是太陽靚仔？她即晒恩愛表示老公靚仔過太陽。
太陽澳門騷前晚吸引了溫碧霞（Irene）跟老公何祖光及養子何國倫齊齊到場睇騷，今次更是Irene跟老公復合後首次現身公開場合。二人拍拖睇騷，不過老公可能怕醜，不肯停留合照。囝囝孖住媽媽睇騷十分興奮，不單幫媽媽攞咪，又於鏡頭前溫馨互錫。問到今次與父母一齊來睇騷，囝囝搶咪激動地表示：「同父母一齊玩，當然開心啦！」
問到溫碧霞最鍾意BIGBANG哪位成員？Irene說：「個個都鍾意，鍾意睇啲跳舞同演出，平時都鍾意聽K-POP。」問她覺得老公還是太陽靚仔？Irene隔空晒恩愛表示老公靚仔過太陽。提到之前跟老公的感情問題，Irene回應謂：「關係比之前好咗。已經過咗去的事就唔再講。」Irene之後大爆囝囝更帶女朋友仔來澳門一同睇騷。
講廣東話冧粉絲
至於太陽前晚8時23分正式登場。他先以人氣歌《Ringa Linga》打頭陣，大叫：「Long time no see, Macau！」成功炒熱氣氛。而他唱《Body》時又跟女舞蹈員大跳辣身舞，引來尖叫連場。而他唱完《Wedding Dress》後，以英文及廣東話說：「Hello Everyone！你好！」向粉絲問好，之後他繼續用英文感謝粉絲來看他的演出，笑言第一次去澳門就是參與BIGBANG的演唱會，表示：「好開心再次見到大家，大家有冇掛住我？」並笑言希望沒有人未聽過他的新碟。
其後太陽換上透視裝繼續勁歌熱舞，唱到《I Need A Girl》時更叫粉絲一起唱，他又驚喜自彈自唱BIGBANG歌曲《Last Dance》，之後他說：「多謝澳門！大家玩得開心嗎？每次唱BIGBANG的歌就會諗起隊友，我人生所有最開心的時刻都是與隊友一起，我們亦一起共度了10年，好多謝粉絲一直都站在我們的身邊，多謝晒！我愛你哋！我不會忘記今晚。」
太陽安哥時表演了《Break Down》、《Good Boy》等歌曲，其間他將毛巾拋落台，之後表演BIGBANG的《BANG BANG BANG》及《Fantastic Baby》，令現場氣氛高漲，最後以人氣歌曲《Eyes, Nose, Lips》為演唱會畫上句號。