■有「獨人」在集會上舉起「港獨」旗。傳統反對派一時話要誓死捍衛人哋「討論『港獨』」嘅權利空間，一時又叫人哋要「睇場合」，真係好「民主」、好一致㗎。立法會討論修改議事規則，一班傳統反對派喺大樓對出條街到「示弱」，不斷「吹雞」叫人撐場，但「獨派」嚟咗又怕人哋搶焦點。有「黎智英保鑣」之稱嘅工黨郭紹傑噚日仲喺facebook出文，稱集會主題係「反對修改議事規則」，話「獨派」會「sidetrack」（轉移）咗個訴求，開到聲想趕「獨派」走。「獨派」就揶揄返佢唔畀人棟支「港獨」旗，但自己就棟晒政黨旗咁，所謂集會其實只係傳統反對派嘅補選造勢大會，要佢哋去撐場？「不了。」 ■香港文匯報記者 甘瑜
郭紹傑噚晚以「震驚」心情喺fb貼咗張有人舉住「港獨」旗嘅相，然後就話︰「你有權宣揚你嘅理念，我尊重你，但係我哋呢幾日嘅集會主題，唔係爭取『香港獨立』，係反對『保皇黨』修改議事規則，你知道嗎？你今晚的出現，明天共產黨就會大篇報道我們的集會是宣揚『港獨』，再sidetrack我哋香港人主要嘅訴求，和分化我們。」
「肥黎保鑣」鬧「獨派」騎劫
咁大個罪名笠落嚟，當然都引起好大反彈。「民陣」副召集人鄭司律都留言話︰「我唔同意你嘅睇法。如果介意嘅，活動性質就唔應該公開。」「David Chan Chi-Man」就寸返轉頭︰「唔見你地（哋）自己搞？」
「黃活志」亦鬧「獨派」︰「佢地（哋）係專為『阿爺』製造缺口既（嘅）寄生蟲，呢D（啲）人就係往往係（喺）你打緊仗果（嗰）陣係（喺）背後插你一刀，所有參與者應該合力根絕呢班人。」
不過，論網上攻勢，傳統反對派當然唔夠「獨派」嚟。被視為「青症Plan B」嘅袁健恩就喺郭紹傑篇文度開始罵戰，「去集會都唔支持政黨，而係反修改，咁政黨旗應全部收起。」
「Jones Cheng」就幫傳統反對派兜︰「係（喺）『雨傘』時，頭一個月各政黨都不掛旗......之後各政黨都比（畀）人口實，話各政黨都冇參加抗爭。」袁健恩就突破盲腸話︰「咁『獨派』拎支『獨』旗出黎（嚟）咪一樣。『港獨派都反修改』。」佢再另外留言話︰「如果拎支旗唔得，咁講補選係咪要打靶？」
的士梁批叫人撐場又趕人
其他「獨派」都各自出文夾攻。「青症雙邪」之一嘅的士梁（梁頌恆）就話︰「你班大佬搏哂（晒）老命叫人去造勢，工黨郭紹傑就係（喺）度趕人走係咩策略？」
中大學生會前會長周竪峰亦曲線稱︰「大家請遵從大會呼籲，和平離開現場。擬前來者請立即取消行程，留在家中休息。」
「膠登仔」組成嘅fb專頁「聚言時報」就揶揄︰「哦，原來係郭紹傑糾察長，咁『泛民』咪又豎晒自己政黨啲旗出嚟，依（??）加（家）夠唔係補選造勢大會啦，好意思話人拎支『港獨』旗出嚟。」
最有心機嘅應該係「Tinki Lo」，佢就改寫郭紹傑篇文話：「你有權宣揚你嘅理念，我尊重你，但係我哋呢幾日嘅集會主題，唔係爭取工黨選票，係反對『保皇黨』修改議事規則，你知道嗎？工黨支旗今晚的出現，明天共產黨就會大篇報道我們的集會是宣揚選舉，再sidetrack我哋香港人主要嘅訴求，和分化我們。」