「六十六十」（圖7號）及「五十五十」齊齊開上戰場，「五十五十」跑三級賽華商會盃挑戰賽，相信會是各位馬迷嘅重心捧場對象，但同日另一匹「六十六十」，大家可曾留意過呢隻馬，不過呢隻馬與「五十五十」嘅馬主無關，亦唔係「八十八十」嘅同主馬，因為「五十五十」與「八十八十」先至係同主，至於「六十六十」係由另一位馬主擁有，此人乃蘇啟聲，目前同主有匹「共創更好」，所以呢件綠底倒轉黃色三角圖案嘅綵衣，大家一定會有印象，今次元旦日賽，佢女兒蘇凱欣也派出「超凡夢想」列陣，兩父女希望齊齊在元旦日拉頭馬。
「六十六十」大家想知道係乜嘢來頭，據知「六十六十」係今季法國自購馬，周歲拍賣價一百四十七萬港元，運來港前跑過四仗，最初三仗跑沙膠地千五及千六米，取得兩冠一季，來港前最後一仗交蘇銘倫跑表列賽，路程是草地千六米，結果得季軍，一匹在法國跑得唔多嘅馬，周歲價經已要近百五萬港元，相信馬主購入嘅價錢都唔會便宜。今次初出便安排跑田草千四米，路程雖然未必係最佳射程，但以呢隻馬進度及質素，在港初戰跑短一點亦無所謂，反正有質素搭夠，初出插入三班上陣是非常着數。「六十六十」賽前一早搵定法國騎師巴度操練，埋門彈過兩課大閘，第一課喺十一月底試谷草千二米，由於進度普通，所以只跟大隊而回，不過大家都咪睇小「六十六十」走勢，佢輸俾呢課大閘嘅頭馬「福穎」三個馬位左右。到咗十二月十二日，馬房再安排「六十六十」彈課千二米泥地大閘，今次走位4 4 4，過終點只距離頭、二馬「太陽旺旺」及「一哥」唔夠兩個身位，呢課大閘證明咗隻馬跟得先，拉士亦有番咁上下後勁，所以今次用巴度跑千四米，大家唔好以為佢冇料到。