「帝勝之星」同「超凡夢想」一對四班馬，在第三場千四米列陣，前者用莫雷拉披甲，後者依然係今季騎開嘅潘頓，相信馬迷好自然咁揀咗「帝勝之星」，因為呢隻馬季內雖然未贏過，但所跑嘅三場賽事，除最近一仗跑谷草一哩三甲不入外，早前兩仗跑田草千四米均有上名表現，今次跑回有根據嘅田草千四米，馬迷必定會吼住繼續捧場。不過，從潘頓嘅眼裡，今次「帝勝之星」必定有瑕疵，否則佢唔會放棄呢隻馬嘅主帥權，拱手相讓俾莫雷拉。當然，又未必係潘頓相讓，可能佢認為目前所騎嘅「超凡夢想」，實力會喺「帝勝之星」之上，所以一心一意替呢隻馬效力，推庄咗「帝勝之星」嘅策騎權。其實，今季潘頓兩騎「超凡夢想」嘅表現並不差，首戰跑千四米得第七，輸俾頭馬「白鷺飛翔」兩個身位。再出馬房依然安排隻馬出戰千四米，潘頓再次效力，呢次竟然落到兩倍半大熱門，不過只得一席第五名而回，輸俾頭馬「南莊加寶」兩位三，距離比起前一場稍為遠啲。不過，上述兩場潘頓喺陣上嘅演繹方式都有不同之處，最初得七名嘅一仗，潘頓入彎時經已踩油，所以直路中段曾經出現過有突圍而出之勢，但將近一百米時間，隻馬力度稍稍轉弱，卻未完全斷得晒。到最近再出嘅一仗，今次潘頓中段無踩油，初段跟隨馬群尾疊，入到直路至搵位衝，點知一直搵唔到空位，焗住再次兜出中外檔衝，就係咁樣蝕咗呢兩個餘馬位返嚟，大熱門未能補中成功。當然，馬匹實力有幾多喺手，最清楚莫過於鞍上人，潘頓呢兩次輸「超凡夢想」，馬匹際遇或騎師嘅發揮都有瑕疵，今次馬房再度安排隻馬跑千四米，潘頓鍥而不捨再替呢隻馬效力，相信今次必定會有交代，上次損過手喺呢隻馬身上嘅馬迷，不妨追捧多一次，有機會本利歸還。
【獨有消息】超凡夢想本利齊還
2017-12-29
新聞排行
圖集
視頻