■神駒用圖概括張秀賢的「極速康復」過程。fb圖片有份落場玩反對派「初選」嘅學聯前常委張秀賢，早幾日報稱俾人襲擊，不過唔使兩日，原本唔可以屈曲嘅右手，就俾網民發現已經完全康復，仲可以落力派傳單添（𠻹）。成班村民就繼續質疑，張秀賢「遇襲」似乎真係自導自演啦。
早前有網媒踢爆張秀賢俾人跟蹤嗰陣，竟然有大街唔行行巷仔，被稱為施襲者嘅嗰兩個男人本來施施然咁行，無幾步之後就好似聽到導演嗌「Action」咁急步跑，就令到成件事撲朔迷離嘞。
首日未能屈曲 次日未能伸直
「無敵神駒」仇思達噚日就整咗張圖，概括張秀賢報稱遇襲之後嘅傷勢同康復進度，例如報稱遇襲當日就係「右手未能屈曲」，第二日上庭嗰陣就變做「右手未能伸直」，第三日開街站嗰陣更加「完全康復」，伸盡晒隻右手咁手指指！神駒仲特登tag（標籤）埋張秀賢，話佢「傷勢嚴重」，請大家「為佢祈禱」喎。
神駒班「益友」當然唔會放過張秀賢啦，「KH Wong」就覺得佢一係用咗龍珠許願，一係就食咗仙豆。有啲就一口咬定佢係做戲，「Sumwunn Speshal」鬧爆佢未做議員先做政棍，「陳秀珠」就「讚」成套劇情耐人尋味、引人入勝，仲以為係以前撈編劇嘅「熱狗」過氣「首領」狗達（黃洋達）寫嘅。「Bean Y C Ho」就繼續玩膠，祝佢吉人天相，「早日脫離危險期。」
體會到「人間有愛」之後，張秀賢亦都喺神駒個帖文度留言：「多謝關心！」唔知呢幾粒字係咪用右手打呢？ ■香港文匯報記者 陳庭佳