反對派成日口講民主，但一到選舉，唔係叫人含淚投票，就係幫市民「規劃」好晒。話說立法會嘅建築、測量、都市規劃及園境界議席因為姚松炎前年宣誓玩嘢被DQ而懸空，姚松炎自己選擇空降西九補選，反對派就「規劃」好由南區區議員司馬文出選，噚日做埋宣佈。司馬文接受媒體訪問時仲打晒開口牌，話已經同民主黨吳永輝傾掂數，只會有一個人出選，相信對方會「信守承諾」喎。但人哋係咪認同由你出選先？
睇住反對派點樣開聲搶位，點樣用霸權迫走其他人，真係學到好多嘢。
司馬文噚日宣佈以「CoVision」團隊名義出戰補選，唔少人當然問佢咁有傳有意參選嘅吳永輝呢？司馬文就話，佢哋之前已經傾掂數，話同意只係一個人出選，咁吳永輝邀請過前財爺鬍鬚曾（曾俊華）出選，而鬍鬚曾又唔出，所以討論應該結束，佢咪宣佈囉，相信對方會「信守承諾」。
姚松炎怪吳永輝「唔講聲」
咪住，係問緊吳永輝喎。司馬文就答完㗎啦，但姚松炎都有幫手防守吓嘅。
姚松炎話，吳永輝冇同佢講過想參選，仲怪返人哋轉頭話「又唔同我講聲」，最後再加多句「希望佢以大局為重」，你話幾絕呢。
雖然司馬文明明唔係建築、測量、都市規劃及園境界嘅選民，有機會入唔到閘，但反對派好多人已經認為佢係最佳人選，似乎佢今次開咗聲話出選先，吳永輝都冇乜機會嘞。
司馬文就話，自己過去一直有從事相關工作，前年選委會選舉都入到閘，覺得自己今次都冇問題。佢仲講明，自己擁護基本法，唔支持「港獨」咁話。
咁樣睇，民主黨今次補選都幾陰功，九龍西又要讓姚松炎上，姚松炎原本嗰席又要讓司馬文上，最慘係網民「Chui Lan Lau」仲覺得係民主黨唔啱︰「係（喺）九西已經玩嘢喇，如果民主黨再係（喺）界別補選到（度）做二五 ，會兩邊唔到岸，佢阿爺及真正支持民主嘅人必定徹底摒棄。」 ■香港文匯報記者 甘瑜