■周庭辭職文近日在網上不斷被回帶。fb截圖「我誤判，我恐懼」但最終冇行山，但就喺「佔中」嘅「關鍵時刻」以「壓力太大」為由辭任「學民思潮」發言人嘅周庭，近日就報名參加港島區立法會補選，而喺呇菑v嘅選舉宣傳單張簡歷部分，不單止呢段黑歷史俾佢抹咗去，仲厚顏話「為香港付出、奮鬥，一直是我的理想，面對風雨，未曾變改」喎！唔少人不滿佢彈出彈入，仲揶揄佢係為咗立法會議員呢份「薪高糧準」嘅工，就即刻壓力盡消，係名副其實嘅小政棍。
選舉單張抹走退縮黑歷史
周庭近日推出咗選舉宣傳單張，其中梗係大力唱好自己。喺簡介中，佢話自己喺中學時加入「學民」，「參與『反國教運動』」。而喺簡歷中，佢就提到自己喺2013年當選「學民」發言人，2014年投入「佔中」，2015年因「佔中」被警方以「煽動及參與未經批准集結」拘捕。
咪住先，2014年同2015年中間，好似仲有啲嘢噃！唔知佢係咪以為所有香港人都係金魚記憶，單張中完全無提過佢喺2014年10月公開講過，自己任「學民」發言人後「所承受的壓力日益倍增」，「佔中」更令她「身心疲累」，無法再承受如此沉重的壓力，並決定辭去「學民」發言人一職噃！
立法會議席當前，周庭又突然「無畏無懼」嘞，但喺單張裡面一句交代都冇，想將呢段自己不負責任做逃兵嘅往事當作黑歷史埋葬，少年你真係太年輕了！唔少網民近日都喺網上回帶，重貼周庭當年篇辭職文，仲揶揄佢好似周星馳電影《九品芝麻官》中吳啟華飾演的方唐鏡：「我彈出又彈入∼你咬我食呀？打我吖笨！」
被揶揄彈出彈入 冇做過實務
「墳場新聞」的「青永屍」就發帖道：「彈出彈入的小政棍我就唔會支持啦。」網民留言揶揄，話周庭咁鍾意日本流行文化，在在需錢（財），而立法會議員有高額、穩定嘅薪津，現在當然就「壓力全消」啦，「搵食啫，犯法呀！」
「熱狗前首領」黃洋達就喺網台揶揄，「周庭冇實務，好似一張白紙咁，就算要去批評佢，都難以搵啲好實質嘅事項，因為佢根本就冇做過啲咩。就好似『雨傘革命』時，周庭率先棄甲曳兵，大家唔會記得佢犯過啲咩大錯，因為佢根本就唔存在......周庭最卑鄙嘅係，佢摸通咗香港人對於呢種愚昧係好受落，於是就不停賣弄，繼續支持呢啲人，就係民主運動失敗嘅原因。」
「熱城」支持者「藍鳳凰」揶揄：「香港係政治戀童癖重災區，會將自己啲票用黎（嚟）可憐一件『傘革』話自己得17歲，然後陣前着草嘅中二港女公主病『年輕人』。凡年輕少少（小小），掛住『學生』、『年輕』牌坊，香港人就會自動自覺當佢純潔無邪，犯錯都唔鬧得。然後個個好似啲幾廿歲老淫蟲見後生妺就share、follow咁，走去share支持佢哋。至於路線、理念？冇人會留意，然後將權力、錢同足以左右香港將來嘅職位，攞黎（嚟）『可憐』呢啲小屁孩。」
■香港文匯報記者 羅旦