民協老馮（馮檢基）按道理應該係反對派喺九龍西嘅「Plan B」，當姚松炎入唔到閘之後就代佢去馬，不過喺「自決派」等狂轟猛炸之後，就笠水唔做「Plan B」嘞，佢仲提到連屋企人都畀人「問候」埋，認真慘情！平時三句唔埋兩句「原則」、高舉「堅守制度公義」嘅「自決派」，今次就一手破壞反對派各門派四四六六拆掂晒嘅「初選」機制，就引嚟政界左中右齊聲譴責。講真，「自決派」嘅「原則」、「公義」，我哋識條鐵咩？
馮家強斥「不停放箭 背後插刀」
老馮俾「自決派」迫退之後，唔少自己友都睇唔過眼，好似教協總幹事馮家強，就喺facebook批評「有人修補團結，有人卻假團結之名不停放箭、出針、背後插你一刀」，又話有啲人一時話自己「民主派」，一時就「進步民主派」，一時就「自決派」，成條變色龍。
識睇梗係睇留言，馮家強之後仲同親反對派嘅漫畫家「馬龍」唱雙簧，「馬龍」認為呢單嘢係反對派喺「道德高地」跌落嚟，「按照他們的道德品格，一定非常恥笑蘇格拉底，寧願服毒以維護法律而不逃走是好很戇居」，馮家強就話：「唔係㗎。佢哋的邏輯係，你要佢為原則服毒？恥笑啦。但你唔為原則服毒？佢哋剷到你上天花板呀！」
「法政匯思」前召集人任建峰都話，自己唔係老馮支持者，但今次班友真係太過分，一鋪過拆咗「初選」機制，亦都拆咗反對派喺重大議題上嘅「道德高地」，以後都唔知點同市民解釋，「更令人失望的就是今次帶領這個拆機制行動的是平時一日到黑講原則的人......我會永遠記住你們今次對民主運動的『貢獻』；你們以後每一次呼籲『團結』時，我都會想嘔。」
親反對派、自居「時事評論員」嘅「林忌」亦都搞唔清「自決派」嘅「原則」何在：「乜『自決派』唔係最注重『原則』的嗎？成班『原則派』不是因此堅持反對曾俊華（選特首）的嗎？家下（吓）簽咗支持『Plan B』，突然發現原來馮檢基第二就唔支持，個『原則派』掉咗落垃圾筒？」
湯家驊批「非君子所為」
見到老馮呢個昔日同路人咁嘅下場，行會成員、「民主思路」召集人湯家驊擰晒頭，「唉！政治非君子所為，一點沒錯！早有約書、甚麼原則也沒用，『團結』可改寫一切！」佢又慨嘆老馮幾十年嚟嘅付出，喺利益當頭嘅今日變得一文不值。
雖然反對派「初選」搞成咁，最開心應該係建制派，但民建聯立法會議員Ann姐（蔣麗芸）亦都批評「初選」畀咗選民假希望，之後仲任意破壞機制，令人感到佢哋行事兒戲、無協作精神，選民會好反感。
自由黨深水埗區議員李梓敬都為老馮講兩句：「原來『被DQ』，唔係指姚松炎，唔係指劉小麗，係指馮檢基。『被DQ』仲要出嚟開記招，差啲喊住咁講『放棄』後備資格，背後魔掌嘅勢力有幾可怕，大家想像到。」
抽水又點少得「無敵神駒」仇思達？佢話單嘢再證明「泛民」根本就反民主，「老馮好歹是經過民意授權的替補人選，『泛民』肆意剝奪其被選舉權，顯然是強姦民意、摧毀制度、違反民主的粗暴行為。全港市民應該利用選票予以痛擊。」
■香港文匯報記者 陳庭佳