■韓連山將「賣港」改為「和理非」，其後更索性將帖子刪除。網上圖片有意參加立法會新界東補選嘅「新民主同盟」咖喱飯（范國威）點解咁乞人憎？睇吓同佢行得好埋嘅「堅實支持者」、即係「神隊友」係咩款咪知囉！「保衛香港自由聯盟」創辦人韓連山為咗捧咖喱，初選時就不斷狂轟其他唔支持咖喱嘅反對派就係「賣港」，包括民主黨、工黨、「香港眾志」等等全部中晒地圖炮。結果，「佔中三丑」之一陳健民都忍唔住寸佢「宇宙唯一不賣港」，民主黨立法會議員林卓廷就鬧佢分化「民主派」。不過，「粗口教師」林慧思就撐佢，仲鬧「泛民」係超級飯桶，要「遠離飯民保平安」喎。
反對派為咗爭位打大交唔係咩新鮮事，喺初選期間，將明明同係反對派「戰友」嘅對手講到一文不值。當然，佢哋唔會自己出手，而係搵自己支持者做爛頭卒，好以九龍西初選姚松炎打馮檢基咁，前者嘅支持者就講到後者唔死都冇用咁。其實，新界東都唔弱，撐范國威嘅韓連山一樣，四圍開地圖炮。
批評初選圍爐「賣港」
韓連山喺初選前，已經出文質疑反對派初選，話負責設計呢個機制嘅「民主動力」趙家賢同鄭宇碩「與傳統『泛民派』的某些政黨關係太密切自然有所偏袒」，其中「組織投票」的組成，「看到不少會為某一政黨抬轎的組織」，「令人感覺是『圍爐取暖』，甚至有『造馬』、為某一政黨『抬轎』之嫌」等等。
在初選當日，佢仲喺facebook上載了一張林卓廷、工黨張超雄、社福界邵家臻、「眾志」黃之鋒為工黨郭永健拉票的照片，更寫上「飯民賣港集團在大圍！大家能讓他們繼續亂來嗎？快來投票支持真正堅持嘅范國威」。
林卓廷批分化「民主派」
林卓廷就喺電台節目狠批韓連山：「在重要關頭，韓連山竟然分化『民主派』，居心何在？！」陳健民也發帖揶揄：「經過這一役，大家都知道，宇宙唯一不賣港的只有韓連山。」
民主黨立法會議員尹兆堅就留言：「KM（健民）都要發炮，證明有人幾差勁！」郭永健就提醒：「教授小心，明槍易擋，暗箭難防。」
任建峰斥「含血噴人」唯佢獨尊
卸任咗「法政匯思」召集人嘅「澳洲西人」任建峰昨日也撰文，話「韓連山是社運各主要弊病的一個樣本」，批評韓連山「最近四周含血噴全世界是『賣港賊』」，更力數佢事事唯佢獨尊；將其他有否留意他的偉論作為大家是否關心議題的標準，逢集會就爭發言，一旦不讓他上台又會覺得自己不被尊重而發難等等。
「粗口老師」反擊「飯民」
立場激進嘅林慧思就撐韓連山，仲開炮轟傳統反對派中人。佢留言話自己一早就知道初選肯定又係玩圍威喂，「飯民班廢柴，你都係遠離飯民保平安。我而（𠵱）家就玩飯民撐邊個，我就投相反嗰個民主派，搵范國威倒下米都唔錯！因為我肯定香港起碼衰多十年，因為飯民實在超級飯桶！」
佢仲點名鬧民主黨同關係親密嘅教協：「其實最猛鬼嘅就係所有民主黨人，包括教協......（教協）政治取向及其選舉方式都超級造馬！」
韓「被滅聲」 帖都刪埋
不過，韓連山在「壓力」下「被滅聲」，先將引起批評的帖子的內容由「賣港集團」變成「和理非集團」，最後就連帖都刪埋，其後仲話自己要閉關寫作，所以暫別fb喎。