鏡頭面前的藍雪寶，是個正氣凜然、甚至在她口中「有少少惡」的女強人。不過，從學生、家長、校方來看，她應該是個教導有方、呵護備至的好老師，否則她不會在同一間特殊學校度過銀禧。
求學時除了想當警察，她也想教書，前者因身高不達標準而夢想幻滅，後者就因當時老師覺得她發音不正而被「DQ」。最後，她在嶺南學院畢業後，當過一陣子售貨員，之後加入無綫當編導，「做咗3年零，《婦女新姿》話要做直播，我覺得壓力好大，加上當時媽媽生cancer（癌症），TVB啲時間又緊，唔可以成日抽時間陪佢，咪諗住走囉。」
其後，有前編導到特殊學校代課，想湊她一份，加上工作上的導火線，藍雪寶告別大台，重拾教書夢，而當時進入的學校，正是她服務了25年的現職學校，「不過做咗4個月，學校話無位，我轉咗去一間重度弱智學校，當時好艱難、好辛苦，但領會到可以呼吸其實已經好幸福。過咗一年，（現職學校）校長打畀我，讚我當時做得好，問有無興趣返嚟，我就返咗去教。」
編導講求創意，而特殊學校教師也是，這正是藍雪寶強項，但最重要的還是一個「心」字：「其實我過晒老師條界，家訪揀正同學生日嗰日，就買個蛋糕上去慶祝，就算唔係當日都買份禮物仔補祝。有啲家長係咁推，我話唔好當我係老師，而係你哋一家嘅朋友。」■香港文匯報記者 朱朗文