上次本欄提過「豈等閒」前仗喺潘頓胯下只係輸直路未能及時望空，上周末潘頓唔順氣再攞嚟騎結果依絲W，潘頓呢類塞死後補中馬又點止一隻，好似「勁有波幅」前仗直路被困無位出，再出縮程跑谷草一哩，潘頓一放到底贏馬。呢次又有隻「豈等閒」及「勁有波幅」翻版馬，呢隻就係葉楚航馬房嘅「心慷慨」（圖3號）。呢隻「心慷慨」今季一出贏四班谷草千二米，過程非常輕鬆，上三班後馬房逐漸同隻馬部署向中距離進軍，因為其最佳性能一定係中距離，上季也曾經常在千四米上名，而最近兩仗隻馬卻集中火力在谷草一哩列陣，前次排十二檔，鞍上人潘頓可能見排檔差，全程走位11 10 11 11，選擇一次遊馬河戰略，再出馬房再安排「心慷慨」跑谷草一哩，今次排檔稍比前次理想，獲得三檔起步，呢次賠率依然五個開，幕後未因為上次跑第十一名而退縮，但呢次卻只得第四名而回。其實，今次檔位咁理想，點解又發揮唔出最佳威力爭勝，這次落第除了沿途喺內欄塞車外，最大問題係當晚場地有偏差，內欄馬冇着數，反而排中外檔馬更加有利，當晚幾場一哩頭馬好似「常妙星」九檔、「咪走寶」七檔、「靚紫荊」八檔，即使贏千八米嘅「力王」，亦排喺十檔，所以「心慷慨」呢次排個三檔，本來屬好事，但當晚卻成為佢贏馬絆腳石，只得梗頸四。所以，幾時都話跑馬要講運，咁啱嗰次冇運有實力亦要輸，今次馬房再安排「心慷慨」跑一哩又點睇，當然，潘頓再騎經已話明一切，好有決心替呢隻馬爭勝，屆時利外檔或內檔，只有天曉得，不過，講到狀態，呢隻「心慷慨」經已操到火紅火綠，馬迷可以信任葉楚航嘅心機，依然安排隻馬跑一哩，鞍上人潘頓亦從無放棄，呢對騎練組合咁好鬥志，點都值得再追捧一票。