第三場「怡德」歷年來一冠八亞，上季在三班經常三至六名，顯見能力所限，今季甫降四班即負於「馬狀元」獲亞，升上三班又未能再進，重返四班求仁得仁，屬此場穩膽。「飛馬再威」上季贏同程表現佳，但跑法被動，馬房又冇運，只宜作配。
第四場「大四喜」季初田草頻頻上陣無功，直至近仗轉來谷中上陣終於搵到出路，近兩場用蔡明紹及巫顯東俱跑得第二名，今次強配莫雷拉操刀不容再失，輕磅路合可取來港首場勝仗。「八心之友」谷草及泥地千二米俱曾贏馬，近仗走勢已有復甦感，今次對手不強乃建功黃金機會，有力介入戰團。
第五場「咪走寶」當打繼續搏就唔駛問都知，一連兩次一哩快時間一放到底，至少拋離對手兩馬位，今次繼續留喺四班，睇來應該阻唔到佢連贏三場。「歡喜心」早前配蔡明紹在谷草一哩開齋，之後再出都跑得接近，證明評分尚有上升空間，今次交由雷神出馬有力取季內第二場勝仗。
第六場「運財童子」季內十戰獲一贏五位，不脫準繩本色，過往莫雷拉逢騎必熱可惜只獲一勝，但既然今仗肯重新上馬，鬥志不用懷疑。「電子群英」季內向來演出準繩，今次跑八十五分上限三班賽必好好把握機會，路合可介入戰團。
第七場「大聚會」上場排外檔姍姍來遲得第四名，今次抽到黃金一檔起步形勢一百八十度轉變，郭能操刀騎慣騎熟，交出水準可望取季內第一場勝仗。「喜進」至今兩勝俱由潘頓經手，上次易配不放而留，敗績要保留評價，今次人馬故劍重逢，應可還我本來。
第八場「領闖者」今季出道，跑短途屢拚不逞，亦毫無票數支持，上仗在千四米且戰且走得第五，睇血統父系為正宗氣袋，今加程會更合發揮，方嘉柏沉靜多時，係追落後的時候矣。「龍船」演出有時價之弊，但始終在三班贏過兩場，上季八十三分僅敗於「包裝騎士」，今次抽埋一檔起步更沒有低估的理由。