今季巫顯東經常得到徐雨石關照，「紫雲星」、「豹子頭」、「老友記」、「勇冠多」及「埼豐」都係出自徐雨石馬房，呢個禮拜三，徐雨石又有好嘢關照巫顯東，呢隻就係出戰第四場第四班千二米嘅「中華寶貝」，上周日下午，徐雨石返馬房打點戰馬備戰工夫，安排了「敬無極」黃皓楠、「天賜寶」洪維新及「中華寶貝」巫顯東，午間配上馬鞍在地堂踱步，倉主伏在欄邊睇實呢三隻馬踱步，講真三隻馬均有水準，唯獨「中華寶貝」用巫顯東特別吸睛，事情好簡單，黃皓楠復出，師父即送上「紫雲星」頭馬恭賀，徒弟傷癒狀態冇走樣。今次徐雨石多匹戰馬，用徒弟黃皓楠掛帥先後有「敬無極」及「天賜寶」，「中華寶貝」要用黃皓楠一樣可以，但馬房卻偏偏將「中華寶貝」留俾巫顯東，大家細心聯想一吓，倉主特別留有一手，應是明醒巫顯東居多。再看「中華寶貝」現時狀況，今仗在四班上陣，形勢相當有利，因為季初呢隻馬尚處於三班作賽，只以頸位之微負於「競駿時代」蹄下，足證牠跑三班相當有分量，如今在四班跑，顯然隨時可以郁手。上仗用羅理雅跑，配搭加強而三甲不入，但大家睇睇「中華寶貝」這席第八名，輸俾頭馬「指揮官」只是兩個身位，匆匆一個禮拜後再戰，用上有七磅可減巫顯東，目的何在，相信畫公仔唔使畫出腸，屆時若有好賠率，呢隻有班利而且毋須負重磅嘅路程專家「中華寶貝」就有一爆本錢，值得吼實。