■王祖藍同李亞男異口同聲地表示不要浪費時間，為小事而去吵架。世界上最幸福浪漫的告白方式，莫過於和心愛的人牽着手走遍全世界。 2月14日情人節對於王祖藍同李亞男（LEANNE）呢對夫妻來講，唔單止係情人節咁簡單，更係他們結婚周年紀念。婚後依然甜蜜的兩人，說到夫妻相處之道，他們異口同聲地表示不要浪費時間，為小事而去吵架。而人妻李亞男近年愛上「煮幾味」，實行靚湯綁住老公個心。今日情人節係他們結婚三周年，一向愛錫太太的祖藍已經放下工作，與亞男雙雙飛往海外度假慶祝！
37歲的王祖藍和32歲的前國際華裔小姐冠軍李亞男，拍拖11年，於2015年完婚。有着「最萌」身高差距的王祖藍同李亞男，外界儘管未必覺得他們合襯，但二人的甜蜜卻是有目共睹。新婚初期，祖藍曾因北上拍劇數月，太太獨自在港而有點憂鬱，自此以後，他也避免長時間離港工作。
老婆的話永遠是對的
「我們拍拖11年，結婚前已經經歷了很多事，從拍拖到分手再復合，基本上大家好清楚對方的性格，相處得愈久，便發現愈來愈夾。而且現在工作忙，已經唔夠時間見面，我們兩個基本上結婚咁耐未試過鬧交。因為我們都不喜歡花時間鬧交。浪費時間，鬧完一輪，心情又不好，解決不到問題，那為什麼要鬧交。最重要是老婆的話永遠是對的，咁為什麼還要鬧交。我們都試過冷戰，但隔咗唔係好耐時間就會好番，互相say sorry。記得結婚初期，我要返內地拍劇3個月，太太獨自在港而有點憂鬱，自此以後，我也避免長時間離港工作，最多接劇都係拍一個月就完。」祖藍說。
「地獄廚神」變專家
王祖藍因為參與綜藝節目《奔跑吧兄弟》在內地走紅，工作不斷。不少人覺得夫妻分隔異地易感情轉淡，而且引誘大。問到李亞男可有突擊去內地探班？亞男滿有信心地表示，她有必殺招數去箍實老公，就是煮得一手好餸及煲得一碗靚湯，只因亞男相信留住老公個胃，一定可以留住個人。
「我是鬼妹仔，未來香港前唔識煲中式靚湯。祖藍佢對飲食要求很高，後來在他『鞭策』下，婚後我的廚藝即大躍進，從全不懂煮食到剛出了一本烹飪書。我曾是『地獄廚神』，試過用濃縮湯包炮製羅宋湯給老公，祖藍開心到飲完全部，但之後因為很口渴，知道是味精料後發呆，因此我好不開心，老公就倒過來安慰我。自此，我便開始鑽研廚藝，請教媽媽之外，也有向奶奶取經，熟悉老公的口味。厚切慢煮牛扒、老火花膠雞湯、羅宋湯都難不倒我。而老公每日都要飲一杯鮮榨的蔬果汁，所以我久唔久就要落街市買新鮮的蔬果。祖藍是我第一個男朋友，我好慶幸佢唔煙、唔酒，好多人問我會唔會好緊張佢身邊係咪有好多狂蜂浪蝶，其實我身邊有好多『針』幫我睇實佢，哈哈！！講吓笑。其實都是信任，只試過一次去探班，佢在片場見到我真的呆了。我們不重視物質，都不喜歡去買名牌手袋和買衫，也不互相送禮物的，有年老公生日，特意請阮兆祥女朋友教我煮一碗馬來西亞蝦麵，咁老公就印象深刻了。」
採訪：植毅儀 攝影：彭子文 服裝：Blind by JW CREDIT(祖藍) 、MARYLING(亞男)
Styling：Dicky Lee 化妝：K.T. Tsui 髮型：Ted Yeung @ i i Alchemy hair & nail
鞋 : Stuart Weitzman(亞男) 首飾 : ArteMadrid(亞男)