恨議席恨到出煙、成日打所謂「本土」旗號嘅「新民主同盟」咖喱飯（范國威），為咗爭贏新界東嗰議席，一直都諗盡辦法入去「本土民主前線」梁天琦嘅票倉，希望乞得一票得一票，但啱啱完咗補選，咖喱飯都未趕得切謝票，就被唔少「本民前」嘅支持者揶揄，話佢喺反對派入面太多「牙齒印」，班激進「本土派」支持者真係寧願含淚投白票嘞。不過范國威今次真係贏咗，有啲激進「本土派」就即刻話，佢哋其實過咗好多票畀佢喎，擺明叫咖喱飯唔好「忘恩負義」。
范「乞票乞到上心口」
網民「Ho Ming Ho」批評，范國威以前一向無點支持「本土派」，今次為咗乞票，竟然應承一旦當選，就會係議員辦事處撥資源關注「在囚抗爭者」同囚權問題，真係「乞票乞到上心口」。網民「Lulu Chung」就好疑惑，問大家：「『泛民』支持者今次要點揀，咖哩（喱）味既（嘅）屎，定屎味既（嘅）咖哩（喱）？」
不過講到底，大家都係為咗爭權奪利，網民「Ron Wong」就話：「本土出唔到人，無辦法，投范國威畀佢拎住十萬人工先！」忠實護法「Max Yu」就立即澄清，「建制派鄧家彪有『鐵票』撐腰，范國威集結『本土派』支持都好正常」，「Kitty Mok」就隨即反駁，「阿彪咁多年盡心盡力為社區，自然有『鐵票』支持，好過范國威無腰骨要乞票！」
成班激進「本土派」講到射落海都唔益咖喱飯咁，但事實係咪真係咁呢？「獨派」組織「勇武前綫」就同佢計數：「（新界東）總投票人416,000，有効（效）票為412,235，即係話有3,765票射咗落海！上次投（梁）天崎（琦）的66,524票有一半去了保長（方國珊）身上，另一部分已經含淚投咗個冚×產（鏟）（咖喱飯）身上！」
數一數票數 范多過楊岳橋
「獨派」中人「陳光明」亦話：「范國威超過18萬票當選，超過楊岳橋（20）16年補選16萬票，最少有兩萬四千個新東本土派含淚投范！」
「Siu Yee」更打埋開口牌：「相信新民主同盟團隊會好好向選民謝票，尤其應該特別鳴謝投比（畀）范國威既（嘅）本土派。要泛民支持者投本土派領袖都要突破心理關口，將心比己，唔係甘（咁）易做。睇范國威18萬+既（嘅）票數，相信都有唔少本土派最後投比（畀）佢。比起聚焦焦土，更加應該多謝呢一班本土派。」
咖喱飯選舉告急時叫激進「本土」過票畀佢，現在真係有人過咗票，咁佢會點報答佢哋呢？當選咗立法會議員，有由公帑支付嘅各種開銷，如果「港獨」分子因為「突然」有資源再搞事，相信大家都會知咩事。■香港文匯報記者 鄭治祖