反對派入面特別多方丈係人都知，但俾人話有份設計姚松炎競選Banner（橫額）都要嬲，心中真正淌血嘅應該係姚松炎同朱凱廸。話說反對派嘅時評人黃世澤早兩日就出咗篇文講姚松炎嘅文宣問題，辣埋河童（黃之鋒）都有退步，河童睇到即刻跳掣，話人哋屈佢有份設計姚松炎啲banner。黃世澤睇到成頭黑人問號，但就唔忿氣自己俾人公審，叫河童以後有乜事都唔好搵佢。「熱狗」前頭目狗達（黃洋達）就食晒花生咁講咗句公道說話︰「而（𠵱）家姚松炎個選舉工程，好似變左（咗）有毒咁，人地（哋）以為你有幫手，就等於潑你污水。喂，話曬（晒）同一陣線，做乜將有份幫手，講到捲入醜聞咁呀。」■香港文匯報記者 甘瑜
一日都係姚松炎唔啱啦，原本朱凱廸手寫banner人人都讚環保有新意，今次佢大意失九西，即刻令大家如夢初醒，發現佢啲banner有幾咁不知所謂。
黃世澤日前就出咗篇文講文宣問題，話姚松炎啲文宣同台灣政客冇得比，然後就講到辣着河童嗰句啦︰「朱凱迪呢套美學係有問題，係連黃之鋒自己都退步埋果（嗰）吓（下）膠（黃之鋒主政嘅『香港眾志』整體），喺張秀賢主政年代嘅學民思潮，果（嗰）套商業化嘅文宣反而係又入到屋，又不會太俗氣。」
黃世澤一句激嬲黃之鋒
其實，黃世澤文末都講咗句「甚至我對任何香港政黨嘅文宣都係咁睇，唔該唔好再俾（畀）呢啲山寨嘢我睇」。不過，河童就覺得對方潑自己污水，即刻喺facebook出文︰「唔知點解會話係我有份設計九龍西補選嘅橫額，仲話我退步埋。......毫不求證，根本不符基礎事實既（嘅）網絡評論，真係一篇都嫌多。」
佢仲驚死黃世澤睇唔到，喺留言位tag（標籤）埋佢話︰「黃世澤係你呀，你邊度見到我幫手設計九龍西嘅橫額？」黃世澤就覆佢︰「我無話你設計，你自己睇清楚文字先。」
河童又問︰「咁又何來在《姚松炎文宣發生乜嘢事》一文提到『黃之鋒都退步埋』？」黃世澤再覆︰「我指你依（𠵱）家『香港眾志』嘅文宣。」再叫佢唔好斷章取義。
雙黃互片 牽連多人「落水」
河童一班水泥隊就不停恥笑黃世澤冇人識，黃世澤俾人公審當然唔忿氣，留言話「黃之鋒，以後你有乜事都唔駛（使）搵我，你比『焦土派』更不堪。」河童老友羅三七（羅冠聰）即刻加入話︰「嘩，咁大口氣。」
河童就繼續玩嘢，將黃世澤啲文貼堂，希望自己嘅回音谷繼續攻擊對方，不嬲同「中箭」友好嘅袁健恩就話︰「算×數，都冇人睇佢啲文，咪幫佢賺Hit rate（點擊率）先得架（㗎）。」
黃世澤就繼續寫文唱衰河童，話對方人緣差，又話自己都間唔中幫河童辯護，話自己曾經幫佢手搞掂加拿大嘅簽證，仲爆料話之前河童喺馬來西亞入唔到境，時評人林鴻達都碌人情卡幫佢搞掂件事，但河童就覺得理所當然咁。
你有水泥隊，黃世澤都搬咗林鴻達出嚟，林鴻達亦都自己開post，引用咗香港文匯報《羅三七訪美 「頤指氣使」犯眾憎》篇文，再講返嗰次河童喺檳城機場被拒入境後，「34個月以嚟，黃之鋒唔只一句唔該 / 多謝/ Thank you 都無講過，不論出自佢把口或經佢嘅盟友轉達都無。更是一直當我透明，唔係閒聊吹水都無，响公開場合見到我連Say Hi & Say Bye 都無即係呢，唔好話知恩圖報咁大件事，係連做人基本態度嘅禮貌兩個字都無。」
河童不嬲都寸㗎啦，係唔知點解有啲人會幫佢咋嘛。狗達就好似嫌雙黃嗌交未夠爆，辣埋姚松炎嗰疊食晒花生咁話︰「為了割??（席），去到咁盡，而（𠵱）家姚松炎個選舉工程，好似變左（咗）有毒咁，人地（哋）以為你有幫手，就等於潑你污水。喂，話曬（晒）同一陣線，做乜將有份幫手，講到捲入醜聞咁呀。」
狗達老婆殘獸胃亦加把口：「我想講，如果你地（哋）係真同盟，所有事情就榮辱與共，當面對挑戰，你係唔可以話條片拍得好我有份，banner 出得衰唔係我做......」