到底見唔到姚松炎宣傳，定係見到姚松炎嘅宣傳海報，邊樣對佢九龍西選情傷害大啲？話說當一大班人鬧姚松炎唔落區、連海報都冇張時，網上最新熱話就係佢啲海報幾咁不知所謂，冇相嘅又有、冇名嘅又有、冇相冇名都有，「尋仇」風格海報又有、反轉重用海報都有，唔少人驟眼望仲以為係姚松炎俾人惡搞，真係騎呢到歎為觀止，連網民都話想集齊一套，好好哋「學吓嘢」咁話。
「重奪」橫額似黑幫尋仇
睇張最簡潔嘅先，白底黑色寫住「重奪」，隔籬就係姚松炎嘅名同本人。網民「林勉一」就話︰「姚松炎團隊呢次選戰，有一樣嘢真係出咗名，就係手作BANNER（橫額）......有朋友笑道，人手寫大字，再貼個姚松炎上去，好似山口組尋仇咁。我睇就覺得似《食神》火雞姐剪貼食神啲相咁。」
第二款就係反轉東區區議員徐子見Banner再寫口號嘅「住屋去除商品化 港人但求有個家」，隔籬寫住投一號。理論上係sell環保，但事實上陽光一照，真係睇到徐子見多過睇到姚松炎，唔知仲以為係叫人投港島一號𠻹。
「可能係史上最差」
反對派個「林忌」直指︰「可能係史上最差的選舉廣告，係咪衰過娥姐同神愛世人？唔好以為係『惡搞』，呢張係姚松炎的選舉廣告......唔該大家路過，影多幾張上來（唔係背後的徐子見呀，佢地（哋）好環保，用舊banner的背面來寫字，不過冇人睇得到係乜。」
第三款就係一度令大家以為係鬧緊姚松炎嘅「市區重建向錢看 以民為本得個講」。「Disong Song Song」忍唔住講心底話︰「係（喺）石硤尾附近都見到姚Sir橫額，最初我以為係建制派搵人惡搞姚Sir，睇真D（啲）原來係堅野（嘢），心諗會唔會弱咗D（啲）......」
DJ「健吾」就揶揄蟲炎堅離地：「同事傳我這條banner的時候，我已O了嘴。睇下（吓）鄭泳舜點講？鄭泳舜到深水埗落區謝票時指出，當選是對其過往在地區工作的認同。他表示，進入議會工作後，將為深水埗居民反映市區重建及劏房等民生問題，亦會盡快約見財政司司長陳茂波，商討及提出修改財政預算案內容。」
健吾話：「對劏房居民（或者也是選民），重建是福音：因為會賠錢畀佢地（哋）走。對那些天天盼錢等錢的人而言，這兩句說話，對他們毫無意義。」
無候選人編號 冇名又冇相
最後一款都唔知計唔計落選舉廣告好，因為既無一號，又冇姚松炎，亦都冇相，連選舉同投票都冇。咁到底有乜？就係一隻小學生風格、大象行去斷頭台嘅畫。fb專頁「福佳與林忌創作」就形容真係好有「幻想力」，「不過冇人知係乜的選舉宣傳品」，相信無論咩人都成頭問號。
「健吾」也抽水道︰「咩玩法？暗黑兵法？」連中出羊子見到都變得謙卑︰「我D（啲）Banner都要企埋一邊了。」
唔少人都大鬧姚松炎嘅宣傳不知所謂，浸大齋Sir（陳士齊）就係其中一個。「林忌」亦喺本人個fb度話︰「有咁樣的豬隊友，真係需要敵人咩？」「Henry Chai」狠批︰「好認真，唔好當選舉係遊樂場，好唔好？」
「許健鵬」一針見血話︰「咁做選舉工程，同做選舉葬禮差不多，白底黑字。」「Steve Chen」就質疑係咪助選團有人「落格」，「朱寶寶」直接問︰「助選團？定助損團？」
勞氣都冇用，姚松炎班人咁做嘅時候不知覺得自己幾醒幾威。「Takki Ma」同「林忌」之後就戲仿姚松炎風格話︰「口號最忌離晒地 印刷費用無得避」、「寫字為左（咗）慳兩蚊 倒輸選票種禍根」、「橫額似足淋紅油 街坊見到掉頭走」。■香港文匯報記者 甘瑜