■見網上討論得咁熱鬧，陳恒鑌唔執輸，即刻P圖表達區內居民訴求。 fb圖片運輸及房屋局局長陳帆上月7日去咗屯門，其間參觀了欣田邨，了解邨內社區設施和居民入伙安排。不過，政府新聞網發嗰張相，就俾人質疑係P圖。結果，唔少網民就無限發揮，將相中陳帆key落其他圖度玩。不過，有識得攝影嘅網民就話只係打燈問題，然後將相壓縮後放落新聞網，所以先「出事」嘅啫！
「幽一默」表達各區訴求
陳帆去屯門視察張相昨日突然喺fb大熱，話張相非常唔自然，引起網上熱烈討論，有人借題發揮話官員「落區都懶要P圖」，有人則仲發揮P圖嘅小宇宙。民建聯立法會議員陳恒鑌亦「玩」埋一份：「帆哥紅透天，大家爭住P佢圖，我都唔執輸，P圖表達下（吓）意見。」
佢喺帖度標註咗唔少地區問題想陳帆跟進，包括「上坡地區要快D（啲）起升降機」、「輕鐵30年只加10駕（架）車緊（梗）逼爆啦」、「青馬大橋唔收橋費幫下（吓）東涌」、「起過渡房屋幫下（吓）劏房居民」、「起多D（啲）車位就唔洗（使）市民等通頂」等。
唔少人就爭論幅相係咪P圖。「Dicky Cheung」質疑：「你留意下（吓），（張相）背影（景）無起格架（㗎），得啲人起格，根本兩張相嚟！」「Cherry Chan」唔同意：「似打燈打得衰，兩個女人d（啲）頭髮罅background都match番（返）大背景。」
相片實地拍攝 打燈壓縮「出事」
「Ka Lam」就唔同意佢個唔同意：「睇燈光都知係key......兩張相燈源完全唔同。同埋頭髮罅係可以退地退出黎（嚟）......」「Cents Ng」則反駁：「原圖無事，壓縮圖先有狗牙。」
姚志豪就話張相「似堅」，仲數咗幾點出嚟：「1.左邊位女仕（士）手錶顯示時間大約下午3時，背景出線斜度跟顯示時間相乎（符）。2.相中人處於有陰頂的暗位，因為相差幾級光度，所以要利用閃出燈打着相中人，感覺唔自然係好正常，因為人物不是自然光。3. 左邊女仕（士）全視線眼鏡變黑呈（程）度與背景光相乎（符），但點解暗位唔變返透明係因為眼鏡唔可以咁快變到。4.唔值得要P呢張圖。」
運房局回覆傳媒時就強調，該張相片的確是在現場實地拍攝，沒有任何改動或加工。 ■香港文匯報記者 陳川