■尹兆堅同林紹輝大派消化餅，「我認為呢種手法極不健康。」fb圖片大家都做地區服務，有時派吓優惠畀街坊，都係關懷嘅一種，但反對派自己做就「理所當然」，建制派做就抹黑做「蛇齋餅糉」。近日，民主黨葵青區議員吳劍昇就喺fb發文，話「有政黨不斷派禮給居民，我認為呢種手法極不健康」喎。民建聯新界西立法會議員陳恒鑌就上載民主黨立法會議員尹兆堅同區議員林紹輝每人派8包消化餅，揶揄話民主黨一邊話自己資源不足，一邊就長派長有，仲質疑佢哋咁有錢，點解仲要搞眾籌。 ■香港文匯報記者 鄭治祖
話說吳劍昇早前喺伭b發帖，話自己「不得不發聲」，唔點名話近期「有政黨不斷派禮給居民」，「我認為呢種手法極不健康」，「我覺得我地（哋）D（啲）居民係需要做實事既（嘅）人幫手，而唔係要個（嗰）啲以為派禮物就可得人心既（嘅）人，我深信人在做，天在看」云云。
恒鑌舉證嘲鴿扮窮實土豪
派禮物同做唔做實事事實上冇矛盾嘅！佢自己都識講啦，街坊都唔係蠢人，唔係畀啲甜頭就呃到嘅。陳恒鑌就喺fb發帖，轉發咗一張WhatsApp截圖，圖中顯示同屬民主黨嘅尹兆堅同林紹輝昨日下午大派朱古力消化餅，仲豪到一人派8包。
陳恒鑌揶揄吳劍昇道：「今時今日，蛇齋餅粽（糉）中的月餅已經過時，白鴿嘅最新玩法係派朱古力消化餅，仲要係每人8包，真係繼派雞、菜、生果、奶粉之後，又一傑作！我地（哋）真係望塵莫及喇！」
佢仲喺帖子標註咗「一邊話自己資源不足」、「另一邊長派長有資源無限」，同時揶揄鴿黨近期嘅「新聞」，包括行政長官林鄭月娥在該黨黨慶捐咗3萬元一事：「3萬元可以派到幾多包消化餅」，同埋該黨議員林卓廷話要搞眾籌調查UGL事件：「洗（使）乜眾籌呀後台咁厚。」
陳恒鑌又在留言中張貼返吳劍昇個帖，寸佢係「失實聲明」。民建聯北區區議員曾興隆就留言，話吳劍昇係「同佢黨友講ga（㗎）。」工聯會新界東社區總幹事鄧家彪也分享陳恒鑌的帖子，淡然道：「真係民主黨地區工作之日常。」
網民爆「奸人堅」派腰包
唔少網民鬧爆民主黨，有人仲貼咗吳劍昇此前搞「愛心茶敘」嘅相。「Tai Ning Lee」更搵返張尹兆堅同林紹輝另一張派腰包嘅海報，仲話：「重點係奸人堅唔係葵青區議會議員，佢用區議會野（嘢）去做同區議員以外的個人宣傳， 真係好鬼奸狡無恥！」
民建聯葵青支部也發帖講呢件事：「即係咁，話說某政黨某議員最近嬲嬲豬，話不斷派野（嘢）比（畀）街坊唔健康，仲投訴自己冇野（嘢）派，但同一政黨同區某議員又不斷派野（嘢）WO（喎），又派奶又派維他命水又派8公斤米又派雞，呢個究竟係咩玩法？媽~我好亂呀！」
尹兆堅在接受香港文匯報查詢時聲稱，不少大機構都會透過地區團體派發一些「差不多到期」的食物，一來不用浪費，供應商也可以節省存倉費用，二來可令市民受惠，達至社會共享的雙贏局面。該批餅乾將於下月到期，由慈善組織「食德好」透過社區共享基金轉贈，民主黨只是扮演「轉介」的角色。
網民鬧爆吳「州官」
Marco Chan：最賤格莫過是批評人做的自己卻做到加零人（一）！民主黨真無恥！
Wong Hing Lee：呢啲咪係只準（准）州官放火不准百姓點燈。成日就話建制派蛇齋餅宴（糉），到而（𠵱）家佢咪又係咁，仲每人八包添（𠻹），呢啲得流氓班泛民先做得出。
Cham Lim：果（嗰）頭笑建制派，呢頭有樣學樣，如此做法簡直衰格無比，泛民唔死都無用的廢物垃圾！
Raymond ML：唔係你！肥仔堅（尹兆堅）就係咁先上位。
Gisy Gu：嘖嘖~ 民主黨講一套做一套，有錢買餅冇錢打官司！眾籌D（啲）錢錢唔打官司都可以代（袋）住先系（係）咪！
資料來源：facebook留言 整理：香港文匯報記者 鄭治祖