■鴿黨海報入面，咖啡廷個衫領疊住吳思諾個頭，搞到佢好似生咗對魔鬼角咁，莫非暗示魔鬼藏在細節裡？ fb截圖時至今日，網民已經越嚟越跟到反對派思路嘞。講就話「天下為公」，實際上又係攤大手板同大家籌旗，今次金額咪就係200萬囉。唔少網民𠵱家都精明咗唔少，直斥反對派又Cap水（斂財），質疑佢哋有case早就攤晒證據出嚟，或者報警、報ICAC啦，仲使乜打官司？又有人質疑，班議員人工起碼9萬蚊一個月，20幾個反對派議員一人捐一個月人工出嚟，籌都唔使籌就200萬啦，點解仲要搵市民笨呢？有網民就覺得，成件事本身就係政治議題，「眾籌其實是個代名詞，相信捐款已經有人認咗頭。」
反對派真係好畀心機搞政治㗎，又整facebook專頁、又拍片叫大家夾200萬「告CY」，仲整咗張疑似海報嘅嘢，但啱啱咖啡廷（林卓廷）個衫領就疊住最近鴿黨力捧嘅吳思諾個頭，搞到佢好似生咗對魔鬼角咁，咁樣再加「天下為公」4個字，都咪話唔盞鬼。
「畀咁多又做咗啲咩？」
其實反對派炒作UGL事件都炒咗幾年，嚟嚟去去得個桔，市民都已經厭到冇得再厭，今次鴿黨4人又攞件事出嚟，仲開口就話要眾籌，唔少人都覺得同網上嘅眾籌騙局好似。「Mars George Chu」反問︰「又籌錢？籌左（咗）咁多鑊俾（畀）咁多政黨做左（咗）啲咩？」
有人就質疑唔通冇罪變有罪，都係有錢使得鬼推磨？「Fong Kwun Shing」就問︰「你『泛民』大把法律及稅務專家啦，幾年都屈唔到一條罪名出黎（嚟），而突然有傻仔比（畀）200萬你，就可以屈得入？哈，其實你地（哋）自己信唔信自己講野（嘢）架（㗎）？」「奀高東」亦話︰「好心喇，如有實質及有力證據何需眾籌打官司呀......只要把證據揭露即可。」
200萬相對成班反對派議員又唔係咩大數目喎，唔少網民就問「佢哋捐幾多先？」但如果佢哋肯包就唔使眾籌啦。fb專頁「無神論者的巴別塔」就形容事件係「飯（泛）民咖啡兄弟又黎（嚟）呃錢」，質疑佢哋鴿黨黨慶先啱啱話籌咗800萬，6隻鴿嘅議員人工每人每月又有9萬幾蚊，但就「一個仙都唔×出，響議會又乜×都做唔倒（到），然後仲有面掉番（返）轉頭叫人幫你班中上產籌旗？即係除咗錢同議席，飯（泛）民主派仲有乜嘢剩餘價值？」
網民質疑自己落晒袋
反對派成日籌完錢就冇影，公眾想睇返盤數都難。「Billy Song」就揶揄︰「律師會計師咪又係佢地（哋）自己，即係落晒袋！律師和會計師唔係應該為公義免費唔收錢？」再加埋反對派咁多嘢籌緊款，自己都競爭激烈㗎，「Fai Ho」就話︰「200萬俾（畀）戴耀庭（廷）攪（搞）『風雲計劃』好過。」
既然佢哋講到「天下為公」咁大，「Ho Sui」就建議︰「最好查埋民主黨，工黨，公民黨收個（嗰）D（啲）黑金，為公義，查埋黎智英屈塗（涂）謹申收黑錢，據理力爭塗（涂）謹申話嘅！」
相比之下，今次籌200萬好似「客氣」咗啲喎。「Darius Chu」寸佢哋︰「預期失敗再上訴，籌一千萬會好啲。」「CB Chan」就分析︰「眾籌其實是個代名詞，相信捐款已經有人認咗頭。」 ■香港文匯報記者 甘瑜