趙恩來同譚凱邦巧威威咁示威張相放喺fb。譚凱邦fb截圖從政者做嘅所有嘢都會影響到其他人，所以必須格外小心謹慎，但你懂的，反對派經常為咗抽水，就有理冇理搞場大龍鳳攞彩先。荃灣一商廈的保安員手指指趕狗狗張相喺網絡瘋傳之後，「新民主同盟」荃灣區議員譚凱邦，同工黨嘅社區幹事趙恩來就去該商廈示威，結果俾人鬧爆未了解事件全部過程就去示威，昨日更網傳話該名保安員已俾人炒咗魷魚。唔少網民狠批兩名政棍害人，要求佢哋公開道歉。單嘢搞到咁大，譚凱邦就將責任賴落豬隊友趙恩來度，話係對方發起呢次抗議喎，真係大難臨頭各自飛咯！
所謂「有片有真相」，當時手指指嗰位保安員只係見狗狗走向車道、靠近正在該處上落貨的貨車所以趕佢走，而當狗狗行開少少、離開咗車道但繼續停留喺中心有瓦遮頭的地方，個保安員已沒再驅趕。但唔少人只睇條文嘅截圖就網絡判官上身，鬧爆個保安員。呢排興「動保」，譚凱邦同趙恩來大前日就去抽水，去該保安員工作嘅商廈示威。
示威炒作 曾傳保安被炒
網民「HO Karen」昨日發帖話：「上網睇到話找左（咗）個保安祭旗，依（呢）幾日有份係（喺）到（度）開post屈保安趕隻狗出去淋雨既（嘅）偽善大愛人仕（士），又電郵又電話轟炸投訴，重（仲）有區議員抽水去示威遞信，如你地（哋）依（𠵱）班片都無睇既（嘅）盲人所願比（俾）你地（哋）屈到個保安比（俾）人炒左（咗），開心啦？」
雖然該保安被炒個傳聞有人否認咗，但唔少人狠批譚凱邦同趙恩來，要求佢哋公開交代並道歉。可能因為趙恩來冇學譚凱邦咁自以為巧威威咁post張示威相上網，所以絕大部分人都將矛頭指向譚凱邦（見表）。
唔認鬧保安 被網民踢爆
譚凱邦留言試圖為自己辯解，話佢哋示威時冇鬧過有關的保安員，目的亦只係「希望每一間公司有動物友善的政策」。
不過，有網民就上載截圖，踢爆譚凱邦曾喺fb發過帖鬧嗰位保安員「真係太冇同情心」，引發其支持者狂鬧個保安員。
輔仁媒體總編輯容樂其都忍唔住寸譚凱邦「你做咩咁弱智」。譚凱邦就借呢個機會話唔關佢事：「是趙恩來發起，而我認同個責任是在管理公司較多，而不在保安員，所以參與，希望管理公司訂立動物友善的政策。」容樂其就寸佢「蛇鼠一窩」。
電台節目主持人「健吾」就「恍然大悟」：「原來係趙恩來發起，唔怪得之啦。我認識既（嘅）你冇咁膠……」「Henry Lau C」就踩一腳：「唔係呀，好合理呀，無果（嗰）樣整果（嗰）個，扮×哂（晒）幫市民爭取，其實就係撈政治油水，好切合『飯（泛）民』/『新民主同盟』黨格。」■香港文匯報記者 陳川
網民促公開道歉
李大文：傳聞個保安俾人炒左（咗），你會唔會去示威，要物管請返佢呀？會唔會道歉呀你？政治光環就拎到足，人地（哋）冇左（咗）份工係咪你養？
黎俊賢：議員唔分析邊件事應該出手就×衝去做，佢呢d（啲）唔使用腦先易做……
Kasing Cheung：垃圾議員只為抽水唔睇真事實累死人。
Amado Amarillo：你（譚凱邦）自己話保安無同情心先！跟手仲貼佢手指指張相出來話要請願，咁同指責佢有咩分別？
Mario Lee：你公開你公司電話同電郵黎（嚟），找網友試下日日轟炸，再找埋議員攪（搞）你，睇下（吓）你公司炒唔炒你？
Hebe Chan Yan Yan：去個（嗰）間公司度、又影哂（晒）相做乜，幫唔到隻狗又連累保安！強烈建議譚先生公開向保安道歉！
Laiying Wong：個保安真係多得佢地（哋）唔少……咁樣搞下次d（啲）人多數直接call漁記（漁護署）費事野（惹）事上身……
Suet Ying Li：譚生，水唔係咁抽架（㗎）！你開放你屋企接濟街上D（啲）流浪漢，流浪動物，要以身作則先有說服力。
Ikyu Wong：好多商場住宅基層員工（保安清潔等等），打風落雨照樣要做外圍工作；有冇政黨可以幫忙，爭取制定「基層員工友善政策」？
資料來源：fb留言
整理：香港文匯報記者 陳川